B. Saǵyntaev sybaılas jemqorlyqqa qarsy saıasat Tujyrymdamasynyń jobasyn talqylady

Almaty ákimi Baqytjan Saǵyntaev bıznes ókilderimen 2022-2026 jyldarǵa arnalǵan sybaılas jemqorlyqqa qarsy saıasat Tujyrymdamasynyń jobasyn talqylaý boıynsha kezdesý ótkizdi.

Is-sharaǵa qala kásipkerleri, onyń ishinde túrli qyzmet salalary boıynsha iri, orta jáne shaǵyn bıznes ókilderi, sondaı-aq memlekettik organdar men Almaty kásipkerler palatasynyń basshylary qatysty.

Kezdesýdi ashqan qala ákimi Baqytjan Saǵyntaev bıznes-sala ókilderiniń strategııalyq qujatty talqylaýǵa qatysýynyń mańyzdylyǵyn atap ótip, qalanyń bıznes ahýalyn jaqsartý maqsatynda odan ári tabysty yntymaqtastyqqa úmit bildirdi.

– Bıylǵy jyldyń 21 qańtarynda memleket basshysy bıznes-qaýymdastyqpen kezdesip, kásipkerlik salasyndaǵy memlekettik saıasattyń negizgi baǵyttaryn aıqyndady. Prezıdent Q.Toqaevtyń ShOB qoldaý jáne damytý jónindegi tapsyrmalaryna sáıkes biz kásipkerlik qoǵamdastyqtyń ózekti máselelerin talqylaý úshin pikirtalas alańdaryn quryp jatyrmyz, – dedi B. Saǵyntaev.

Is-shara barysynda Almaty qalasynyń Sybaılas jemqorlyqqa qarsy qyzmetiniń basshysy Murat Ahmetov 2022-2026 jyldarǵa arnalǵan sybaılas jemqorlyqqa qarsy saıasat Tujyrymdamasynyń jobasyn tanystyrdy.

– Tujyrymdamanyń mańyzdy basymdyqtarynyń biri adal bıznesti damytý bolyp tabylady. Tujyrymdama jobasynda bıznesti sybaılas jemqorlyqqa qarsy standarttardy engizýge yntalandyrý kózdeledi. Korporatıvtik sybaılas jemqorlyqqa qarsy is-qımylǵa erekshe nazar aýdarý qajet, – dep atap ótti Murat Ahmetov.

Kezdesý sońynda qatysýshylar pikirlerimen bólisip, parasatty bıznesti yntalandyrý boıynsha usynylǵan nusqalardy talqylady, Tujyrymdama jobasyna usynystar engizdi. Bıznes-qoǵamdastyqtyń barlyq ıdeıalary men usynystary eskeriletin bolady.

Kezdesýdi qorytyndylaı kele, Almaty ákimi B.Saǵyntaev Tujyrymdama jobasyn qalalyq gazetterde jarııalaýdy jáne «Almaty» TA alańynda pikirtalas alańyn qurýdy tapsyrdy. Memlekettik organdardyń, azamattyq sektordyń jáne bıznes-qoǵamdastyqtyń ókilderi ázirlenip jatqan qujatty keńinen talqylaýǵa jáne sybaılas jemqorlyq kórinisteriniń aldyn alý maqsatynda onyń qaǵıdalaryn keıin iske asyrýǵa tartylatyn bolady.