Qańtar oqıǵasynan keıin ustalǵandardy tergeý boıynsha qoǵamdyq komıssııa qurylady

Belgili zańger Abzal Quspan halyq narazylyǵynan keıingi jappaı tártipsizdikter boıynsha ustalǵan azamattardy tergep tekserýge baılanysty qoǵamdyq komıssııa qurylatynyn málimdedi. Bul týraly ol áleýmettik jelidegi paraqshasynda jazdy.

"Ádildik talap etken, arasha suraǵan aǵaıyn!

Qazir ǵana memlekettik hatshymyz Erlan Qarınnyń qabyldaýynan shyǵyp kelemin. Memleket basshysy quqyq qorǵaý organdary, onyń ishinde birinshi kezekte polısııaǵa adam quqyqtaryn saqtaý týraly qatań tapsyrma bergen. Alaıda, jaǵymsyz habardy taratýshylar jaǵynan da, tipti sol polısııanyń ózi tarapynan da jańa tártipke moıynsunǵysy kelmeıtin arandatýshylar bar sııaqty. Dál ondaı arandatýǵa basqa-basqa qazirgi ýaqytta Aqorda múddeli emes ekeni aıdaı anyq qoı, endi.

Endeshe sol jaǵdaılardy qoǵam atynan tekserip kórýdi bizge senip tapsyryp otyr. Qazir men komıssııa qurýdyń zańdylyǵy, ókilettigi sııaqty máselelerdi talqylaýǵa Bas Prokýratýraǵa baramyn, bastysy Aqorda qarsy emes! Shyqqan soń tikeleı efır jaǵdaıynda júzdesip, jaǵdaıdy ózderińe baıandaıtyn, ózderińizben keńesetin bolamyn" dep jazdy jelide Abzal Quspan.

Eske sala keteıik, 21 qańtarda zańger A. Quspan áleýmettik jelide óziniń jáne birqatar quqyqqorǵaýshylardyń atynan beıbit mıtıngke qatysqany úshin ustalyp, soqqyǵa jyǵylyp, azaptaýǵa ushyrap jatqandardyń jaıyn aıtyp, prezıdent Qasym-Jomart Toqaevqa úndeý joldaǵan bolatyn.