Nursultan Nazarbaev qazaqstandyqtarǵa úndeý jasady (vıdeo)

Qazaqstan Respýblıkasynyń eks-pezıdenti N.Á.Nazarbaev Qazaqstan halqyna úndeý joldady.

2022 jyl Qazaqstan úshin kúrdeli de qaterli synaqtan bastalǵanyna nazar aýdarǵan ol uıymdasqan ekstremıstik toptar elde jappaı tártipsizdik ornatyp, terrorıstik shabýyl jasaǵanyn, sonyń saldarynan beıbit turǵyndar zardap shekkenin atap ótti. Prezıdent Qasym-Jomart Toqaev sheshimderiniń arqasynda el irgesi sógilmegenin aıtty.

– Memleket basshysyn qoldaý – barshamyzdyń azamattyq boryshymyz. Endigi kezekte osy oqıǵadan sabaq alyp, mundaı bassyzdyqqa jol bermeýge tıispiz. Babalarymyz ǵasyrlar boıy ańsaǵan táýelsizdiktiń otyz jyly ishinde atqarǵan isterimiz az emes. Qazaqstan álemge tanylǵan eńseli elge aınaldy. Ulan-ǵaıyr shekaramyz túbegeıli bekitildi. Elimizde irgeli reformalar júzege asyp, Ortalyq Azııada kósh bastadyq. Eýrazııa júreginde, Saryarqa tósinde jańa astanamyz boı kóterdi. Birlik barda eshbir jaý saǵymyzdy syndyra almas, – dedi eks-preıdent.

Sondaı-aq ol 2019 jyly prezıdent retindegi ókilettigin tapsyrǵanyn, sodan beri qurmetti zeınet demalysynda ekenin, eshqaıda ketpegenin, el astanasynda ekenin aıtty. Prezıdent Q.Toqaevqa bılik tolyǵymen tıesili degen ol qaýipsizdik keńesi ótkenin, jýyrda NurOtan partııasynyń tóraǵalyǵy tapsyrylatynyn aıtty. Sózinshe, aralarynda túsinispestik, jaýlasý joq.

Qazaqstannyń burynǵy prezıdenti sońǵy ret el aldyna 2022 jylǵy 28 jeltoqsanda TMD-ǵa múshe memleketter kóshbasshylarynyń beıresmı kezdesýinde shyqqan. Qańtardyń basynda Jańaózende suıytylǵan gaz baǵasynyń qymbattaýyna baılanysty bastalǵan halyq narazylyǵy eldiń ózge óńirlerine de qoldaý taýyp, birneshe qalada halyq tolqýy jappaı tártipsizdikke ulasqanda da Nazarbaev el aldyna shyqpaǵan. Onyń baspasóz hatshysy "elbasy elorda" deýmen shektelgen.

Nazarbaevtyń kórinbeýine baılanysty túrli aqparat taraǵan. Keı derekterde ol Reseıde, endi bir derekte Qytaıda delingen. Birikken Arab Ámirlikterine ushyp ketipti degen de aqparat shyqqan. Keshe brıtanııalyq The Guardian basylymy óz derekkózderine súıenip, Nazarbaev astanada bolýy múmkin ekenin málim etken.

Oqı otyryńyz!

♦ Nazarbaev úndeýi qaıda túsirilgen, ol is júzinde ne aıtqysy keldi?