• USD 468.56

  • EUR 497.56

  • RUB 7.3

  • CNY 67.18

28 Naýryz, 19:19:11
Almaty
+35°

Búgin prezıdent Qasym-Jomart Toqaevtyń tóraǵalyǵymen beınebaılanys rejıminde shuǵyl áreket etý shtabynyń kezekti otyrysy ótti. Otyrysta jańa premer-mınıstr Álıhan Smaıylovqa eldiń áleýmettik-ekonomıkalyq damýyna baılanysty birqatar tapsyrma júkteldi. "Qamshy" tilshisi prezıdent bastamalary týraly saıasattanýshy Samat Nurtazamen shaǵyn suhbat qurdy. 

– Prezıdent Qasym-Jomart Toqaev kótergen máseleler, jańa premer-mınıstrge bergen tapsyrmalar men júktegen mindetter qanshalyqty ózekti?

– Endi qanshalyqty ózekti degen suraq meniń oıymsha durys emes. Bul memleketimizdiń jáne búgingi búkil Alash jurty qarap otyrǵan ózekti másele. Basqa másele joq. Basqa máselelerdi biz óshirip, umytýymyz kerekpiz. Búgin prezıdentimizdiń usynǵan kandıdatýrasy Álıhan Smaıylov myrza jáne oǵan júktelgen mindettemeler óte aýyr, biraq ult úshin, el úshin, jer úshin jasalatyn máseleler. Sondyqtan da qazir barlyǵymyz prezıdentimizdiń aınalasynda toptasyp, kómektesip prezıdentimizge tirek bolýymyz kerek. 

– Prezıdent májilistegi jıynda nelikten saıası reforma taqyrybyn aınalyp ótip, ony aldaǵy joldaýǵa qaldyrdy dep oılaısyz?

– Qylmystyq isterdiń tergeýi áli de bitpeýine baılanysty. Bul jerde saıasattan góri qylmystyq ister kóp bolyp tur. Memleketke opasyzdyq jasaǵan, satqyndyq ister kóp bolǵandyqtan jáne tergeý áli bitpegendikten prezıdentimiz naqty áli barlyǵyn ustap, bilip shyndyqtyń túbine jetpegendikten ázirshe bul máseleni aıtpady. Sebebi qazir asyǵys sheshim bolyp ketýi múmkin. Barlyǵy aıqyndalyp, ashylǵannan keıin prezıdentimiz halyqqa shyndyqty aıtady dep esepteımin.

– Prezıdenttiń Nursultan Nazarbaev otbasy múshelerine qatysy bar delinetin ýtılalym men Qorǵas kedenindegi jaǵdaıdy retteýge baılanysty tapsyrmalaryn qalaı baǵalaısyz?

– Birinshiden, óz basym ýtılge qarsymyn. Meniń oıymsha "ýtıl" degen keregi joq nárse. Tipti ony múldem joımasa da salyǵyn azaıtyp, múmkin búgingi tólep otyrǵan sýmmanyń tek qana 30-40 paıyzyn ǵana qaldyrý qajet dep esepteımin. Ekinshiden, Qorǵas máselesin biz ony barlyǵymyz bilemiz. Prezıdenttiń tilimen aıtsaq, kedendik júıe – jalpy memlekette osy jylǵa deıin jemqorlyqtyń ıisi bolǵan aımaq. Sondyqtan da ol jerde bas prokýratýra óz tártibin ornatyp, kinálilerdi ustap memleketke salyqty kóbeıtedi dep senemin. 

– Qaýipsizdik keńesiniń tóraǵalyǵy N.Nazarbaevtan Q.Toqaevqa ótkeni belgili. О́zin “Nazarbaevtyń kómekshisimin” dep ataǵan Kárim Másimovtyń qamalýy, onyń orynbasary, elbasynyń týysy Samat Ábishtiń qyzmetinen alynýy, búgingi jıynda Nazarbaev áýletiniń yqtımaldy bıznesine baılanysty málimdeler jasaýy el bıliginiń tolyqtaı prezıdentke ıaǵnı Toqaevqa shoǵyrlanǵanyn bildire me?

– Qazir tek qana resmı aqparatqa júginip, sóıleıtin zaman. О́zińiz biletindeı Qylmystyq kodekstiń 274 (kórineý jalǵan aqparat taratý) babynda kórsetilgen. Resmı túrde Kárim Másimov myrzaǵa áli aıyp taǵylǵan joq, sot bolmady. Biraq ol tutqyndaldy. Sondyqtan da qazir naqty bireýdi kánili dep nemese bireý ketti, bireý keldi zaman ózgerdi dep aıtýǵa áli erterek dep esepteımin.

Biraq 2019 jyly 19 naýryzda tuńǵysh prezıdent Nursultan Nazarbaev ketti, 2019 jyly 9 maýsymda jańadan prezıdent saıladyq. Bul naqty resmı aqparat. Sodan beri birdeńe boldy degen jalǵan aqparat. Sondyqtan tek qana resmı aqparattarǵa júgineıik.

 

"Qamshy" silteıdi
Ilmek sózder: Samat Nurtaza

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir