Brıtanııa baspasózi "Toqaev pen Nazarbaevqa jaqyn tulǵalar arasynda shıelenis" týraly jazdy 

Qazaqstandaǵy bolyp jatqan kúrdeli jaǵdaı týraly BBC, Reuters, The Guardian sııaqty sheteldik iri basylymdar jarysa jazyp jatyr.

"Qazaqstanda alǵashynda beıbit bastalǵan narazylyq sherýleriniń sońy zorlyq-zombylyqqa ulasyp, saldarynan kem degende 164 adam qaza tapty" dep habarlady BBC.

Qazaqstan prezıdentiniń keńsesi jeksenbide 6 myńǵa jýyq adam qamaýǵa alynǵanyn, onyń ishinde kóptegen shetel azamattary bar ekenin málimdedi.

"Sherý 2 qańtarda suıytylǵan gaz baǵasynyń qymbattaýynan bastalyp, artynsha Qazaqstandy otyz jyl boıy basqarǵan jáne áli de eleýli yqpalyn saqtap otyr dep esepteletin burynǵy prezıdent Nursultan Nazarbaevqa narazylyqqa ulasty. О́tken aptada Qazaqstanǵa tártipti ornatýǵa kómektesý úshin Reseıdi qamtyǵan birneshe eldiń áskerleri jiberildi" dep jazdy BBC.

Qazaqstandaǵy tártipsizdik pen zorlyq-zombylyqqa baılanysty sheteldik baspasózder ár túrli saraptama jasady.

"Qazaqstandyq elıtanyń ishindegi yqtımal qaqtyǵystar týraly esepter zorlyq-zombylyqtyń negizgi sebebi bolýy múmkin" degen boljam senimdirek sııaqty" dep jazady brıtanııalyq The Guardian gazeti.

Qazaqstan UQK basshysy, burynǵy premer-mınıstr Kárim Másimov aldymen qyzmetinen shettetilip, bir apta ishinde "memleketke opasyzdyq jasady" degen kúdikpen qamaýǵa alyndy. "Másimovtyń ne istegeni" týraly tolyq málimet aıtylmady.

The Guardian Qazaqstandaǵy jaǵdaı úshin "keıbir aqparat kózderi Toqaev pen Nursultan Nazarbaevqa jaqyn tulǵalar arasyndaǵy sońǵy kelispeýshilikterdi aıyptady" dep jazdy.

Al, BBC "Bul zorlyq-zombylyq jaǵdaıy Qazaqstannyń bıleýshi elıtasyndaǵy bılik úshin talaspen baılanysty" degen boljamdar kóbeıip keledi" degen pikir aıtady.

Basylym sonymen qatar, búlikshiler Almatyny basyp alýǵa árekettengenin jáne qaladaǵy polısııa beketterin baqylaýǵa alýǵa tyrysqanyn, Qazaqstan qaýipsizdik kúshteri olardyń kózin joıǵanyn habarlaǵan.

BBC prezıdent Qasym-Jomart Toqaevtyń Almatyǵa 20 myń terrorıst shabýyl jasaǵanyn málimdegenin jazdy. Basylym sonymen qatar Toqaevtiń qarsylasqandarǵa "eskertýsiz oq atýdy" tapsyrǵanyn habarlady.

Fransııa "Eýropanyń syrtqy ister mınıstrleri osy aptada Qazaqstandaǵy jaǵdaıǵa jaýap retinde yqtımal sharalardy qarastyrady" dep málimdedi. Fransııanyń Eýropa isteri mınıstri Klement Bon CNEWS-ke bergen suhbatynda "Qazaqstan bıligi" Eýropa qabyldaı alatyn sharalardy talqylaý kerek: halyqtyń, narazylyq bildirýshilerdiń, kótirilisshilerdiń ómir súrý qunyn tárki etip, basyp tastaı almaısyz" dedi.

AQSh Memlekettik hatshysy Entonı Blınken jeksenbi kúni Qazaqstan prezıdentiniń nusqaýyn synǵa alǵan. "Atyp óltirý tártibi, ol qanshalyqty bolsa da, durys emes jáne sheshim joıylýy kerek. Biz jarııalanǵan tótenshe jaǵdaıǵa alańdaımyz" dep suhbat berdi ol ABC News telearnasyna.

Onyń aıtýynsha, AQSh Qazaqstan prezıdentinen nelikten reseılik áskerlerdiń qatysýyn suraǵanyn túsindirýdi de surap otyr.

Taǵy bir jańalyq boıynsha, qamaýda jatqan, qatty soqqyǵa jyǵylǵany beınelengen kadrlar paıda bolǵan qyrǵyz djaz mýzykantynyń Qazaqstanda ustalýyna baılanysty kórshi Qyrǵyzstan Qazaqstanǵa narazylyq bildirgen.

Qazaqstan Vıkram Rýzahýnovty narazylyq aksııalaryna qatysty dep aıyptap, ony memlekettik telearnadan kórsetken.