Mańǵystaý oblysynda balyq óńdeıtin kásiporyn ashyldy

El Táýelsizdiginiń 30 jyldyǵy aıasynda Túpqaraǵan aýdany, Baýtın aýylyna qarasty Atash eldi-mekeninde «AtashFıshProm» JShS-niń balyq óńdeý sehy iske qosyldy, dep habarlaıdy Túpqaraǵan aýdany ákimdiginiń baspasóz qyzmeti. 

Joba quny 83 mln. teńge. Qýattylyǵy jylyna 292,8 tonnany quraıtyn kásiporynda balyqtan fıle, farsh, ystalǵan jáne konservilengen balyq shyǵarylatyn bolady. 

Kásiporynnyń ashylý saltanatyna oblys ákiminiń orynbasary Bekbol Orynbasarov pen aýdan ardagerleri jáne zııaly qaýym ókilderi qatysty. Bekbol Orynbasarov turǵyndardy Táýelsizdik kúni merekesimen quttyqtap, aımaqtaǵy balyq ónerkásibiniń mańyzdylyǵyna toqtalyp ótti. 

- Oblys basshysynyń tapsyrmasy boıynsha aldymyzda óńirde óndiriletin azyq-túlik taýarlarynyń kólemin arttyrý mindeti tur. Onyń ishinde et jáne balyq ónimderin óndirý isin qolǵa alýymyz tıis. Osy oraıda, Túpqaraǵan aýdany kásipkerleriniń eńbegin atap ótken jón. Turǵyndardy jergilikti ónimmen qamtamasyz etip, jańa jumys oryndaryn qurýda jańadan ashylǵan kásiporynnyń mańyzy zor, - dedi Bekbol Orynbasarov. 

Sehtyń tehnıkalyq dırektory Amalbek Tóleýmaǵanbetovtiń aıtýynsha, balyq qaldyqtarynan óndiristik un shyǵaryla bastady. Bul undy qus, mal azyǵyna jáne eginshilikke tyńaıtqysh esebinde paıdalanýǵa bolady. Joba tolyq iske qosylǵanda 15 adamdy jumyspen qamtý josparlanyp otyr. 

- Kúnine 2 tonnaǵa deıin balyq qaldyqtarynan un shyǵaratyn qurylǵymyzdy ornatyp, jumys júrgizip jatyrmyz. Qazir bir kúnde 1 tonnaǵa deıin balyq unyn, jarty tonnaǵa deıin qurama azyq shyǵaryp jatyrmyz. Suranys bar. Bul Qazaqstandaǵy osyndaı jalǵyz seh bolǵandyqtan Reseıden de, elimizdiń ózge óńirlerinen suranystar túsýde, - dedi Amalbek Tóleýmaǵanbetov.