“Dımashpen dýet jazǵym keledi”. Jeli juldyzy Gúlmaıdanmen suhbat

Qurylysta istep júrip án aıtyp jelide tanymal bolǵan Gúlmaıdan Serikbaı (laqap aty – Dana) Qamshy tilshisine suhbat berdi. Gúlmaıdan jelide keńinen taraǵan vıdeo qashan jáne qandaı jaǵdaıda túsirilgenin, ózi týraly jáne kelip túsip jatqan usynystar týraly aıtty.

Gúlmaıdan Serikbaı Ǵalymjanqyzy 1994 jyly Qyzylorda oblysy Shıeli aýdany Bestam aýylynda dúnıege kelgen. Qyzylorda qalasyndaǵy Qorqyt Ata ýnıversıtetinde "joǵary mýzykalyq bilim" mamandyǵynda oqyp, alaıda otbasylyq jaǵdaıǵa baılanysty oqýyn 3-kýrstan keıin tastap ketýge májbúr bolǵan.

Gúlmaıdan ánshilik ónerge burynnan jaqyn bolǵanyn aıtady.

– Jalpy maǵan ánshilik óner naǵashy ájem Yrysqal О́ksikbaevadan daryǵan shyǵar dep oılaımyn.  Biraq ol kisini ózim múldem kórmegenmin. Úlkender "daýysy jaqsy bolǵan edi" dep aıtyp otyratyn. Negizi ánshilikke burynnan jaqyn boldym. Kafe, meıramhanalarda án aıtyp, kásibı túrde aınalysqanym bar. Keıin pandemııa bastalyp, bári karantınge jabylǵanda jumys toqtap, tabyssyz qaldym. Janbaǵý úshin qurylyspen aınalysýǵa týra keldi, – deıdi jeli juldyzy.

Gúlmaıdan Serikbaı bir sátte jelide tanymal bolyp ketkenine áli de sene alar emes.

– О́zimdi áli "juldyz" boldym dep eseptemeımin. Biraq halyqqa tanymal bolý óte keremet sezim eken. Bundaı jaǵdaıǵa kez kelgen adam qýanatyn edi dep oılaımyn. Keıde osynyń bári tús sııaqty kórinedi, – deıdi ol.

Aıtýynsha, jelide taraǵan vıdeony arnaıylap  túsirmegen. 

– Almatyǵa kelgenime 4 aı boldy. Qyzdarmen birge jumys isteımiz. Jelide taraǵan vıdeo mektepti remonttap jatqan kezimizde aldyńǵy aptada túsirilgen. Birge jumys isteıtin ápkemdeı bolyp ketken Juldyz degen qyz bar. Sol án aıtyp jatqanymdy syrtymnan túsirip, jelige salyp jiberipti. Vıdeo túrli pablıkterge tez taralyp, bári áp-sátte bolyp ketti. Men mundaıdy  múldem kútpedim. Onyń aldynda Juldyz maǵan "ánderińdi áleýmettik jelige salaıyq" dep únemi aıtatyn. Men oǵan  kelispeı júrdim. Sóıtsem, syrtymnan túsirip, salyp jiberipti, – deıdi ánshi qyz.

Qazirgi tańda Gúlmaıdanǵa túrli usynys kelip jatqan kórinedi.

– Qazir prodıýser bolýǵa nıet bildirip, usynys aıtyp jatqandar bar. Tipti óleń men sóz jazyp bergisi keletinder tabylýda. Bet árleýshilerge deıin habarlasyp, kómek bergisi keletinderin jetkizip jatyr. Telearnalar da jıi shaqyrady, – degen ol negizinen batys elderi ártisteriniń ónerin jaqsy kóretinin, otandyq ártisterdiń ishinen Dımash Qudaıbergendi, Janar Duǵalova, Aıqyn Tólepbergen, Ninety One tobyn tyńdaıtynyn,  Dımashpen dýet jazǵysy keletinin aıtady.

Qazirgi ýaqytta  Gúlmaıdannyń Instagram paraqshasyna  60 myńǵa jýyq adam jazylyp úlgergen. Onyń vıdeolary alǵash Tik-tok jelisinde tarap, tanymal bola bastaǵannan keıin ǵana  Instagram-nan paraqsha ashqan.

 

 

 

Posmotret etý pýblıkasııý v Instagram

 

 

 

Pýblıkasııa ot Ánshi | Pevısa (@anwi_dana)

 

 

 

Posmotret etý pýblıkasııý v Instagram

 

 

 

Pýblıkasııa ot Ánshi | Pevısa (@anwi_dana)