Foto: Halyk Bank PR-qyzmeti
Halyk Bank taýly marshrýttardyń shalǵaı ýchaskelerine arnalǵan 11 qutqarý úıshigin, 18 kún batareıasyn ornatyp, Tótenshe jaǵdaılar departamentine 1 pılotsyz ushý apparatyn syıǵa berdi. Bul týraly Almatyda týrızmdi damytý jónindegi áleýmettik joba aıasynda ótken brıfıngte belgili boldy. Brıfıngke Almaty ákimdigi týrızm basqarmasy, Tótenshe jaǵdaılar departamenti, qalalyq qutqarý qyzmeti jáne Halyk Bank ókili qatysty.
Is-shara qatysýshylarynyń aıtýynsha, endi Almaty taýlary týrıster úshin qaýipsiz bola túsedi.
Týrızm basqarmasynyń basshysy Sabına Amankeldi qala ákimdigi alpınızm federasııasy jáne taý qaýymdastyǵymen birlesip taýdaǵy qaýipsizdikti qamtamasyz etýge baǵyttalǵan sharalar keshenin ázirlegenin atap ótti.
– Taýly marshrýttardyń shalǵaı ýchaskelerinde 15 qutqarý úıshigi ornatylyp, qolaısyz aýa-raıy kezinde týrıster ataýly jerde toqtap, jylynyp, adasyp ketken jaǵdaıda nemese jazataıym oqıǵa bolsa úıshikte jan saqtap, kómek kúte alady. Úıshikterde alǵashqy medısınalyq kómek jınaqtary, atap aıtqanda alǵashqy medısınalyq kómek jınaǵy, marshrýt kartalary, mobıldi qurylǵyny qýattaý stansııasy, otyn, jyly kórpe jáne buzylmaıtyn azyq-túlik jıyntyǵy bar. Eń bastysy – árbir qutqarý úıshigi dabyl túımesimen jabdyqtalǵan, onyń kómegimen týrıst qutqarýshylarǵa sıgnal bere alady. Bul úshin arnaıy SOS spýtnıktik sıgnalyn qutqarýshylardyń pýltine daýystyq habarlamamen almasý múmkindigin berý úshin 10 radıorelelik dińgek ornatylǵan. Sonymen qatar, machtalar Wi-Fi taratý fýnksııasymen jabdyqtalǵan, – dedi ol
Qutqarý úıshikteri Ile-Alataý ulttyq parki mamandarymen kelise otyryp, taýdyń jetý qıyn bıik jerlerine tikushaqpen jetkizilgen. Saıahat aldynda týrıster osy aqparatpen tanysýy úshin olardyń ornalasqan jeri 2GIS qosymshasynda kórsetilgen.
Sonymen qatar brıfıngte týrıstik navıgasııanyń biryńǵaı júıesin qurý jáne taýǵa serýendeýge arnalǵan TauGo qosymshasyn iske qosý boıynsha jumys júrgizilip jatqany aıtyldy. Qosymsha Almaty qalasy Tótenshe jaǵdaılar departamentiniń bazasymen biriktiriledi dep josparlanýda.
Sondaı-aq jıynda týrısterdiń qaýipsizdigi úshin uıaly baılanyspen qamtý aımaǵy keńeıtilip, kishi jáne úlken Almaty shatqalynda 2 baqylaý-qutqarý pýnkti jáne Tuıyqsý shatqalynda tikushaq alańy salynyp jatqany habarlandy.
– Árıne, mundaı aýqymdy jospardy seriktesterimizdiń qoldaýynsyz júzege asyrý múmkin bolmas edi. Halyk Bank-tiń bizdiń suranysymyzǵa ún qosqany jáne taý qaýipsizdigin qamtamasyz etý úshin, osyndaı mańyzdy jobany júzege asyrýǵa kómekteskeni úshin alǵys aıtamyz, – dedi týrızm basqarmasynyń basshysy.
Halyk Bank joba aıasynda demeýshilik ári kómek retinde 101 mln 479 myń teńge aýdarǵan. Onyń ishinde 47 300 000 teńge – modýldik qutqarý úıshikterin daıyndaýǵa, 39 924 000 teńge – avtonomdy kún elektr stansııalaryn satyp alýǵa jáne 12 000 000 teńge izdestirý-qutqarý jumystaryn júzege asyrý úshin pılotsyz ushý apparatyn satyp alýǵa jumsalǵan.
– Bank úshin bul joba óte mańyzdy. Adam ómirinen basqa qundy eshteńe joq ekenin bárimiz jaqsy túsinemiz. Osy jyldyń mamyr aıynda bolǵan Sharyn shatqalyndaǵy qaıǵyly oqıǵa qaýiptiń aldyn alý, qaýipti joıý qajet ekenin aıqyn kórsetti. Apat aıtyp kelmeıdi. Degenmen jazataıym jaǵdaı bolǵanda sıgnal berýdi qamtamasyz etý, kómek kelgenge deıin panalaý múmkindigin jasaý – bizdiń qolymyzda. Sondyqtan, qutqarý tobyn shaqyrý fýnksııasy bar taý úıshikterin ornatý jónindegi bastamany qos qoldap qoldadyq. Eger izdeý jumystary kezinde osy úıshikter nemese dronnyń arqasynda bir adamnyń bolsa da ómiri qutqarylsa, onda atqarylǵan is beker bolǵan joq esepteımiz, – dedi Halyk Bank PR-qyzmetiniń basshysy Ásel Orazbaeva.
Almaty qalasy Tótenshe jaǵdaılar departamentiniń málimetinshe, 2020-2021 jyldar aralyǵynda Almaty taýlarynda 5 adam qaza tapqan. Onymen qosa taýly jerlerde 66 adam, onyń ishinde bir bala qutqarylǵan. Izdestirý-qutqarý jumystary Myńjylqy ústirtindegi Tuıyqsý aımaǵynda jıi júrgizilgen. Ol jerdegi mundaı jaralardyń jalpy sany 30-dy quraıdy.
Izdestirý-qutqarý jumystary jıiligi boıynsha ekinshi oryndy Úlken Almaty shyńyndaǵy Kosmostansııa alady. Kók Jaılaý ústirtinde taǵy 7 Izdestirý-qutqarý jumystary ótkizilgen. Osy ýaqyt ishinde izdestirý-qutqarý jumystaryna 312 adam, 22 kınologııalyq jasaq jáne 59 qutqarý tehnıkasy jumyldyrylǵan. 2021 jyly kınologııalyq izdenisterdiń kómegimen 8 adam tabylǵan. Sondaı-aq, joǵalǵan adamdardy izdeý úshin Taýǵa daıyndyq ortalyǵynan jolserik-qutqarýshylar men LIDER.KZ eriktileri tartylady.
– Izdestirý-qutqarý jumystaryn tıimdi júrgizý úshin Tótenshe jaǵdaılar departamenti qyzmeti joǵalǵan adamdy tapqan kezde oǵan ornynda qalýǵa jáne qutqarýshylardy kútýge shaqyratyn dabystyq habarlama aıtýǵa múmkindik beretin dron satyp alýdy usyndy. Mundaı fýnksııanyń bolýy izdestirý kezinde óte mańyzdy. Habarlamany estigen soń adam úreılenbeıdi, adasqan adam ony tapqanyn jáne jaqynda kómek keletinin túsinedi. Sondaı-aq osyndaı "aqyldy" dronnyń kómegimen zardap shekkenderge dári-dármek, azyq-túlik pen ómirlik mańyzdy jabdyqtardy jetkizýdi qamtamasyz etýge bolady, – dedi Almaty qalasy Tótenshe jaǵdaılar departamenti basshysynyń orynbasary Erlan Álibekov.
Kvadrokopterlerdi búkil álemde qutqarý qyzmetteri burynnan qoldanyp keledi. "Drondar" jetý qıyn jáne qaýipti aımaqtarǵa ushyrylady, onymen qosa drondar aýa-raıy jaǵdaılary boıynsha taýlarda tikushaqtyń ushýy múmkin bolmaǵan jaǵdaıda qajet.
Avtonomdy kún stansııalary taýlarda "jasyl energııany" 1,5 ese kóp óndirýge múmkindik beredi, óıtkeni bıiktikte kún aǵynynyń sáýlelenýi áldeqaıda kúshti. Osylaısha, qutqarý modýlderiniń tolyqqandy jumys isteýi úshin qajetti elektr energııasynyń turaqty túsýi qamtamasyz etiledi.
Búgingi kúni qutqarý-baqylaý úıshikteri josparlanǵan jerlerge ornatylǵan jáne barlyq qajetti qural-jabdyqtar jáne azyq-túlik jıyntyǵymen tolyq jabdyqtalǵan.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir