Parlament raqymshylyq zańyn qabyldady

Parlament senatynyń jalpy otyrysynda táýelsizdiktiń otyz jyldyǵyna baılanysty raqymshylyq jasaý týraly zań qabyldandy.

Ishki ister mınıstri Erlan Turǵymbaev zań jobasynyń maqsaty – asa aýyr emes jáne aýyrlyǵy ortasha qylmys úshin jazadan bosatý jáne keıbir aýyr, asa aýyr qylmystar úshin jaza merzimin qysqartý ekenin atap ótti.

– Raqymshylyq ardagerlerge, kámeletke tolmaǵandarǵa, jasy úlkenderge, birinshi jáne ekinshi toptaǵy múgedekterge, qoǵamǵa qaýip tóndirmeıtin adamdarǵa qoldanylady, – dedi mınıstr.

Turǵymbaevtyń aıtýynsha, qazir elde 64 mekeme men 16 tergeý ızolıatorynda 34 myń adam bar. Onyń ishinde 30 myń azamatqa sot úkimi shyqqan. Qalǵan 4 myń adam tergeýde qamaýda otyr. 93 paıyzy aýyr jáne asa aýyr qylmys jasaǵany úshin qamaýda otyr. 45 paıyzy onyń aldynda birneshe ret sottalǵan. Sonymen qatar, 32 myń adam probasııalyq baqylaýda tur.

– Zań jobasy boıynsha 2 292 sottalýshyǵa, probasııalyq baqylaýda turǵan 11 753 adamǵa raqymshylyq jasalady. Nátıjesinde 1 myń adam qamaýdan bostandyqqa shyǵady. 3881 adam probasııalyq baqylaýdan bosatylady. Ekinshiden, 1330 sottalýshynyń, probasııada turǵan 7492 adamnyń jaza merzimi qysqartylady. Úshinshiden, sotqa deıingi tergeý óndirisindegi 5 myń qylmystyq is qysqartylady. Onyń ishinde 1674 adam qylmystyq jaýapkershilikten bosatylady, 1471 adamǵa sot organdary jaza merzimin qysqartý nemese bosatý erejeleri qoldanylady, – dedi Erlan Turǵymbaev.

Qylmystyq kodekstiń 78-babyna sáıkes aýyr jáne asa aýyr qylmys jasaǵan adamdarǵa raqymshylyq jasalmaıdy.