"14 adam qaza tapty". Ázerbaıjanda áskerı tikushaq apatqa ushyrady

Ázerbaıjanda áskerı tikushaq qulap, 14 adam qaza taýyp, taǵy 4 adam jaralandy. Bul týraly Ázerbaıjan memlekettik shekara qyzmetiniń baspasóz ortalyǵy habarlady.

Memlekettik shekara qyzmetiniń habarlaýynsha, apat 30 qarasha kúni jergilikti ýaqyt boıynsha saǵat 10.40-ta Garageıbat aımaǵyndaǵy Hyzın aýdanynda ornalasqan ushý-jattyǵý polıgonynda bolǵan.

Tikushaqtyń qulaýyna qatysty qylmystyq is qozǵaldy. Qazir tergeý respýblıkanyń bas prokýratýrasynyń baqylaýynda. 

Ázerbaıjan memlekettik shekara qyzmetiniń basshysy general Elchın Gýlıev tikushaqtyń apatqa ushyraýyna syrtqy faktorlardyń qatysy joq ekenin aıtty. Sondaı-aq zardap shekkenderdiń aýrýhanada emdelip jatqanyn jáne olardyń jaǵdaıy qalypty ekenin málimdedi.

– Apat týraly estigennen keıin oqıǵa ornyna bardym. Sol jerden prezıdent Ilham Álıevke baıandama jasadym. Álıev oqıǵany qosymsha zertteý, marqumdardy jerleý jáne jaralylardy emdeý jóninde tapsyrma berdi. Ushqysh bizdiń tájirıbeli ushqyshtarymyzdyń biri bolatyn. Tikushaq ta is júzinde jańa edi. Qazir birdeńe dep te aıta almaımyz. Biraq bul apatqa syrtqy kúshterdiń esh qatysy joq dep aıtýǵa bolady, – dedi Elchın Gýlıev.