Jeltoqsanda qazaqstandyqtardy qandaı aýa raıy kútip tur?

Qazgıdromet jeltoqsan aıyna arnalǵan aýa raıy boljamyn jarııalady.

Sınoptıkterdiń málimetinshe, jeltoqsanda aýa temperatýrasy norma shamasynda bolady. Eldiń soltústik jartysy men batysynda aýa temperatýrasy normadan 1° joǵary bolady dep kútilýde.

"Jaýyn-shashyn mólsheri respýblıkanyń basym bóliginde norma shamasynda, ońtústik-batys jartysynda normadan az, eldiń shyǵys jartysynda jáne qıyr soltústik-batysynda normadan kóp bolady dep boljanady. Aıdyń basynda Skandınavııa aýdandarynan soltústik-batys sıklonymen baılanysty atmosferalyq fronttar turaqsyz aýa raıyn týdyratyn bolady, aldymen batysta, sodan keıin eldiń ózge aýmaǵyna yqpalyn tıgizedi, jaýyn-shashyn kútiledi. Kóbinese qar túrinde, ońtústik aımaqtarda jańbyr sońy qarǵa ulasady. Aıdyń ortasynda eldiń ońtústik-shyǵys jartysynyń taýly jáne taý bókterindegi aýdandarynda qatty jaýyn-shashyn kútiledi. Sondaı-aq turaqsyz aýa-raıy jeldiń kúsheıýi, boran, tuman jáne kóktaıǵaq boljanady" delingen aqparattyq habarlamada.

Jeltoqsannyń alǵashqy kúnderinde eldiń basym bóliginde jyly aýa raıy bolady.

Soltústikte aýa temperatýrasy túnde -10-18°S-tan 0,-8°S-qa deıin, kúndiz -3-8°S-tan -5+5°S-qa deıin joǵarylaıdy. Ońtústikde túnde -2+8°S-tan, kúndiz +10+18°S-qa deıin joǵarylaıdy.

Batys óńirlerde, kerisinshe, aýa temperatýrasy túnde 0,-8°S, kúndiz +7°S-qa deıin tómendeıdi dep kútilýde.

Birinshi onkúndiktiń ortasynan bastap Barens teńizi aýdandarynan soltústik-batys antısıklonnyń basyp kirýine baılanysty aýa temperatýrasynyń tómendeýi boljanady.

Aýa temperatýrasy batysta, soltústik-batysta túnde -7-15°S-qa deıin, kúndiz -5-11°S-qa deıin, soltústikte, ortalyqta, shyǵysta túnde -18-26°S-qa deıin, kúndiz -10-18°S-qa deıin, ońtústik-batysta túnde 0,-5°S-qa deıin, kúndiz +7+2°S-qa deıin tómendeıdi.

Birinshi onkúndiktiń sońynda ońtústikte, ońtústik-shyǵysta túnde -5-13°S-qa deıin, kúndiz 0,-5°S-qa deıin tómendeıdi

Birinshi onkúndiktiń sońynda jáne ekinshi onkúndiktiń basynda Jerorta teńiziniń shyǵys jaǵalaýyndaǵy aýdandardan jyly aýa massalarynyń kezekti shyǵarylýymen aıazdardyń álsireýi boljanady.

Respýblıkanyń soltústik, shyǵys jáne ortalyq aımaqtarynda jeltoqsannyń úshinshi onkúndiginde túnde -27-35°S-qa deıin, kúndiz -18-25°S-qa deıin qarqyndy sýyq tolqyndardyń qaıtýy kútiledi. Qazaqstannyń batys jáne ońtústik óńirlerinde aýa temperatýrasy túnde -5-15°S-tan 0,-5°S-qa deıin, kúndiz 0,-10°S-tan 0,+5°S-qa deıin aýytqıdy dep boljanady.

Aıdyń ortasynda ońtústik jáne ońtústik-shyǵys aımaqtardyń turǵyndaryn jyly aýa raıy kútedi. Kúndizgi aýa temperatýrasy +10°S-qa deıin boljanady.

Aıdyń ekinshi jáne úshinshi onkúndikterinde soltústik óńirler men taý bókterineqarly boran men jeldiń kúsheıýi kútiledi.