Shymkentte qalanyń qurmetti azamattary týraly jınaq jaryqqa shyqty

Búgin Shymkent qalasynyń memlekettik muraǵaty ǵımaratynda «Shymkent qalasynyń Qurmetti azamattary» jınaǵynyń tanystyrylymy ótti. Tusaýkeser rásimine qala ákiminiń birinshi orynbasary Shyńǵys Muqan, qalanyń Qurmetti azamattary, zııaly qaýym ókilderi men jastar qatysty.

El Táýelsizdiginiń 30 jyldyǵyna oraı toptastyrylǵan jınaqtyń tusaýyn kesken Shyńǵys Muqan jaryqqa shyqqan týyndynyń maqsatyna toqtaldy.

«Bıyl memlekettik Táýelsizdigimizge 30 jyl. Bul mereıli beles ótkenimizdi saralap, bolashaǵymyzdyń baǵdaryn belgileıtin kezeń. Qalamyzdyń búgingi dárejege jetýine talaı býynnyń eńbegi sińdi. Qalanyń qalyptasýynda jarqyn iz qaldyrǵan kóptegen qaıratkerlerdiń esimderi tarıhymyzda atalmaı umyt qaldy. Bul baǵytta qala tarıhyn, onyń ómirinde esimi belgili bolǵan tulǵalar taǵylymyn jınaqtaý maqsatynda qala ákiminiń tapsyrmasymen «Shymkent ensıklopedııasy» jaryq kóretin bolady. Osy jobanyń bastamasy retinde búgin «Shymkent qalasynyń Qurmetti azamattary» jınaǵyn shyǵaryp otyrmyz. Bul kitap – jas urpaqqa, kópshilik qaýymǵa daryndy shymkenttikter týraly keńinen maǵlumat berip, qala turǵyndarynyń ıntellektýaldyq áleýetin arttyrady degen oıdamyn»,-dedi qala basshysynyń birinshi orynbasary.

Jınaqta 1967 jyldan 2021 jyldar aralyǵyndaǵy kezeńde Shymkenttiń órkendeýine erekshe úles qosqan 145 túrli sala qaıratkerleriniń ómir deregi, sińirgen eńbekteri tizbektelgen. Kitapqa engen tulǵalardyń esimderi qala nemese ońtústik óńirine ǵana emes, búkil respýblıkamyzǵa, halyqaralyq dárejede tanylǵan. Olardyń qatarynda belgili kompozıtor Shámshi Qaldaıaqovtyń, memleket qaıratkeri Asanbaı Asqarovtyń, qoǵam qaıratkeri Ádil Sasbuqaevtyń, ataqty bapker Myrzaǵalı Aıtjanovtyń, taǵy basqa elge belgili azamattardyń esimderi bar.

Is- shara barysynda Shymkent qalasynyń qurmetti azamattary Erkin Satqanbaev, Myrzaǵalı Aıtjanov sóz sóılese, Shymkent qalasynyń qurmetti azamaty, Halyq aqyny Muhtar Shahanov pen Amalbek Tshanovtyń beınejoldaýy kórsetildi.

Jınaqtyń baspadan shyqqan alǵashqy 1 myń danasy qala kitaphanalary men oqý oryndaryna taratylmaq.