Almatyda Aron Atabekti aqtyq saparǵa shyǵaryp saldy (vıdeo)

Búgin, 26 qarasha Almatyda halyq dıssıdent aqyn, oppozısıoner Aron Atabekti aqtyq saparǵa shyǵaryp saldy.

Marqumnyń janazasy qaryndasy Rázııanyń úıinde shyǵaryldy. Janazaǵa shamamen 100-den astam adam jınaldy.

Marqumnyń múrdesi Baǵanashyl zıratyna qoıylady.

Aron Atabek 24 qarashada saǵat keshki 8 shamasynda qaıtys bolǵan.

Bıyl 1 qazanda Pavlodar soty 2006 jylǵy Shańyraq oqıǵasynan keıin 18 jylǵa sottalǵan Aron Atabektiń qalǵan jaza merzimin bostandyǵyn shekteý jazasyna aýystyryp, aqyndy "densaýlyq jaǵdaıyna baılanysty" túrmeden shyǵarǵan. Aqyn buǵan qarsylyq tanytyp, ózin tolyq aqtaýdy talap etken.

5 qazan kúni belsendiniń jaǵdaıy kúrt nasharlap, aýrýhanaǵa shuǵyl jetkizilgen. Keıin Atabektiń aýrýhanaǵa jatýdan bas tartqany belgili boldy. Artynsha ol úıinde jasandy tynys alý apparatymen demalyp jatqany habarlandy.

Artynsha Aron Atabektiń densaýlyǵy nasharlap komaǵa túskeni, jeke klınıkada jatqany habarlanǵan. Uzamaı beti beri qaraǵany týraly aqparat shyqqan.

Aron Atabek 15 jyldan astam ýaqyt túrmede otyrdy. Ol 2006 jylǵy "Shańyraq" oqıǵasynan keıin 18 jylǵa sottalǵan. Sot Atabekti "Shańyraq" oqıǵasy kezinde qaza tapqan polısııa qyzmetkeriniń ólimine aıypty dep tanyǵan.

Keı belsendiler aqynnyń túrmeden bosatylýyn "bılik Aron túrmede ólip qaldy dep jaman atty bolmas úshin bosatty" dep túsindiredi.