Aron Atabektiń qyzy: Saraptama nátıjesiniń ashyq bolatynyna senbeımiz

Almaty qalasy Qalqaman yqshamaýdanyndaǵy máıithana aldynda ákesi Aron Atabektiń múrdesin kútip turǵan Aıdana Aıdarhan Qamshy tilshisine ákesimen sońǵy ret kóriskende ol sóıleı almaǵanyn, biraq qaraly habarǵa bári shok bolǵanyn jetkizdi.

– Biz úlken shok áserindemiz. Biz onyń aýrýhanada bolǵan sebebi, óliminiń sebebi týraly eshteńe bilmeımiz. Bizge eshteńe aıtpaı jatyr. Biz máıitti soıǵannan keıingi saraptama nátıjesiniń ashyq jáne zańdy bolatynyna senbeımiz. Sońǵy ret men ony (Aron Atabekti - red) kórgende onyń tamaǵynda tútikshe boldy. Ol sóıleı almady. Biraq meni birden tanydy. Oǵan suraq qoıǵanymda maǵan ymmen ǵana jaýap bere aldy. Ol esin biletin, biraq ol óte aryq jáne júdep ketken edi. Senbi kúni de biz kezdesýge tyrystyq. Ony emdeıtin dáriger oǵan eshkimdi kirgizbeıtinin aıtty. Maǵan dárigerler ákemniń densaýlyǵyna qatysty eshqandaı aqparat bermedi. Men onyń dıagnozy men qandaı em qabyldap jatqanyn da bilmedim. Qazir ekspertterdiń nátıjesin kútip otyrmyz, – deıdi ol.

Buǵan deıin belsendiler Aron Atabekti túrmede ýlaǵan bolýy múmkin ekenin aıtqan.

Aqyn, dıssıdent, oppozısıoner, Shańyraq oqıǵasynan keıin 18 jylǵa sottalyp, jýyrda densaýlyq jaǵdaıyna baılanysty bosatylǵan Aron Atabek keshe qaıtys bolǵan.

Bıyl 1 qazanda Pavlodar soty 2006 jylǵy Shańyraq oqıǵasynan keıin 18 jylǵa sottalǵan Aron Atabektiń qalǵan jaza merzimin bostandyǵyn shekteý jazasyna aýystyryp, aqyndy "densaýlyq jaǵdaıyna baılanysty" túrmeden shyǵarǵan. Aqyn buǵan qarsylyq tanytyp, ózin tolyq aqtaýdy talap etken.

5 qazan kúni belsendiniń jaǵdaıy kúrt nasharlap, aýrýhanaǵa shuǵyl jetkizilgen. Keıin Atabektiń aýrýhanaǵa jatýdan bas tartqany belgili boldy. Artynsha ol úıinde jasandy tynys alý apparatymen demalyp jatqany habarlandy.

Artynsha Aron Atabektiń densaýlyǵy nasharlap komaǵa túskeni, jeke klınıkada jatqany habarlanǵan. Uzamaı beti beri qaraǵany týraly aqparat shyqqan.

Aron Atabek 15 jyldan astam ýaqyt túrmede otyrdy. Ol 2006 jylǵy "Shańyraq" oqıǵasynan keıin 18 jylǵa sottalǵan. Sot Atabekti "Shańyraq" oqıǵasy kezinde qaza tapqan polısııa qyzmetkeriniń ólimine aıypty dep tanyǵan.

Keı belsendiler aqynnyń túrmeden bosatylýyn "bılik Aron túrmede ólip qaldy dep jaman atty bolmas úshin bosatty" dep túsindiredi.