• USD 424.85

  • EUR 504.21

  • RUB 5.84

  • CNY 65.86

09 Jeltoqsan, 01:24:35
Almaty
+2°

Foto: Almaty oblysy ákiminiń baspasóz qyzmeti

Búgin Qazaqstan Respýblıkasy Prezıdenti Ákimshiliginiń Basshysy Erlan Qoshanov Memleket basshysynyń Jarlyǵymen Almaty oblysynyń ákimi laýazymyna taǵaıyndalǵan Qanat Bozymbaevty oblys aktıvine tanystyrdy. Oblysty buǵan deıin basqarǵan Amandyq Batalovqa Prezıdenttiń alǵysyn jetkizdi, dep habarlady Almaty oblysy ákiminiń baspasóz qyzmeti.

- Búgin birqatar kadrlyq ózgeristerge baılanysty Almaty oblysyna kelip otyrmyn. Memleket basshysynyń Jarlyǵymen Amandyq Ǵabbasuly Batalov Almaty oblysynyń ákimi laýazymynan bosatyldy. Amandyq Ǵabbasuly 7 jyldan astam ýaqyt Jetisý óńirine basshylyq etti. Osy jyldarda oblys jaqsy kórsetkishterge jetti, kóptegen iri jobalar iske asyrylyp, bul óńirdiń damýyna úlken serpin berdi. Memleket basshysy Amandyq Ǵabbasulynyń jumysyn óte jaqsy baǵalap, oblys ákimi laýazymynda kóp jyl jemisti qyzmet atqarǵany, óńirdi damytýǵa jáne oblystyń áleýmettik-ekonomıkalyq áleýetin arttyrýǵa eleýli úles qosqany úshin alǵysyn jetkizýimdi tapsyrdy. Amandyq Ǵabbasulynyń mol tájirıbesi, aqyl-keńesi qoǵam ómirinde áli de paıdasyn tıgizedi dep oılaımyn.

Búgin oblystyq máslıhat depýtattarynyń kelisimen osy óńirdiń týmasy, buǵan deıin Jambyl, Pavlodar oblystaryn basqarǵan, Energetıka mınıstrligine jetekshilik etken, birqatar ulttyq kompanııalardyń basshylyǵynda bolǵan, óte tájirıbeli isker basshy Qanat Aldabergenuly Bozymbaev Prezıdenttiń Jarlyǵymen Almaty oblysynyń ákimi bolyp taǵaıyndaldy. Almaty oblysynyń damýyn Prezıdent erekshe nazarda ustaıdy. Sondyqtan jańa ákim alǵa qoıǵan mindetterdi laıyqty atqarady dep senemin, - degen Erlan Qoshanov Qanat Bozymbaevty jańa qyzmetimen quttyqtap, jumysyna sáttilik tiledi.

Munan soń Amandyq Batalov sóz alyp, Almaty oblysynda qyzmet etken 20 jyldaı ýaqytta Jetisý jeri týǵan ólkesindeı ystyq mekenge aınalǵanyn aıtty.

- Eń aldymen kezinde meni joǵary laýazymǵa taǵaıyndap, mindet artqan Elbasyna úlken rahmet aıtamyn. Memleket basshysy Qasym-Jomart Kemeluly ókilettigimdi uzartyp, bastaǵan isterimdi jalǵastyrýǵa múmkindik berip, senim bildirdi. Sondyqtan Memleket basshysyna aıtar alǵysym zor. Osy jeti jylda ujymymmen birge úlken ister atqardyq, aýqymdy josparlardy oryndadyq. Bul rette ózińiz, Erlan Jaqanuly, únemi qoldaý tanyttyńyz, sol úshin rızashylyǵymdy bildiremin. Qanat Aldabergenulyn erte kezden tanımyn, qatar eńbek ettik. Almaty oblysyn basqarý osyndaı bilikti mamanǵa senip tapsyrylǵanyna rızamyn, - degen A.Batalov Qanat Bozymbaevqa qaltqysyz qyzmet, abyroıly eńbek tiledi.

Qanat Aldabergenuly Almaty oblysyn basqarýdyń ózine senip tapsyrylýy zor jaýapkershilik ekenin jetkizdi.

- Almaty oblysynyń orny men úshin erekshe. О́ıtkeni Jetisý ata-babam ómir súrgen meken. Sondyqtan da ystyq. Jalpy oblystyń áleýeti zor, shekaraly aımaq. Ony halyqtyń ıgiligine paıdalana bilýimiz kerek. О́ńirde Amandyq Ǵabbasulynyń basshylyǵymen irgeli ister atqaryldy. Men de óz tarapymnan oblysty damytýǵa bar kúsh-jigerimdi jumsaımyn dep ýáde beremin. Halyqtyń senimin aqtaýǵa barymdy salamyn, - dedi Q.Bozymbaev.

Aktıv atynan oblystyq ardagerler keńesiniń tóraǵasy Ermek Kelemseıit, Isker áıelder óńirlik keńesiniń tóraıymy Rımma Salyqova sóz alyp, el múddesi jolynda birlesip atqarǵan jumystary úshin Amandyq Ǵabbasulyna alǵys aıtyp, jańa ákim Qanat Bozymbaevtyń qyzmetine tabys tilep, qoldaý bildiretinderin jetkizdi.

Aktıv sońynda Qazaqstan Respýblıkasy Prezıdenti Ákimshiliginiń Basshysy Erlan Qoshanov máslıhat depýtattaryna qoldaý bildirgeni úshin rızashylyq bildirip, kópshilikti el Táýelsizdiginiń 30 jyldyǵymen quttyqtady. Sol sııaqty oblysty damytýda ınvestısııa tartý, jańa jumys oryndaryn ashý, indetpen kúres sharalary basty basymdyq bolyp qala beretinin aıtty.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir