Bolgarııada avtobýs apatynan 45 adam qaıtys boldy

Bolgarııanyń batysynda avtobýs apatqa ushyrap, órtenip, kem degende 45 adam qaza tapty. Onyń ishinde 12 bala bar.

Oqıǵa el astanasy Sofııanyń ońtústik-batysyndaǵy Bosnek eldimekeniniń mańynda jergilikti ýaqyt boıynsha 02:00 shamasynda tas jolda bolǵan.

Avtobýs Soltústik Makedonııaǵa tirkelgen, onyń ishinde negizinen sol elden kelgen jolaýshylar bolǵan. Apat pen órttiń sebebi qazir anyqtalýda.

Bolgarııa ishki ister mınıstrliginiń resmı ókili avtobýstyń órtenip, sodan keıin soǵylǵany nemese soǵylǵannan keıin órtenip ketkeni belgisiz ekenin aıtty.