Aýdan ákimi turǵyndar suraǵyna jaýap berdi

Halyqpen keri baılanys ornatý jáne máselelerdi turǵyndarmen birge talqyǵa salý maqsatynda, Shymkent qalasy Abaı aýdanynyń ákimi Buharbaı Parmanov qala ákimdiginiń @akimat_shymkent ınstagram paraqshasynda tikeleı̆ efırge shyqty. Efır barysynda aýdan aýmaǵyn ınfraqurylymmen qamtý jóninde atqarylǵan jumystardy baıandady.

Aýdanǵa 2014 jyly 10 eldi meken qosylǵan. Alaıda shalǵaı aýdandardy ınfraqurylymmen qamtý máselesi qala ákimi Murat Áıtenovtyń tapsyrmasy negizinde 2020 jyldan bastap qolǵa alynǵan. Qysqa merzimde 461 mln. teńgege JSQ-lar ázirlenip, qazirde qurylys jumystary qyzý júrgizilýde.

Aýdanda 34 eldi mekenniń 24-i sapaly sýmen qamtylǵan, 10 eldi meken unǵyma sýyn paıdalanyp kelgen. 2020 jyly Jańatalap, Igilik, Táýelsizdikke – 20 jyl, Kókbulaq, Qyzyljar turǵyn alabynda qurylysy bastalyp, bıyl paıdalanýǵa berildi. Yntymaq-2, Batys, Nurshýaq shaǵyn aýdanyna jyl sońyna deıin sapaly sý berilse, Qursaı men Arǵymaq keler jylǵa ótpeli.

Tikeleı efırde elektr júıesimen qamtýǵa da toqtalyp ótti. Aýdan ákimi 8 eldi meken jekemenshik júıeden jaryq alatyny, ony memlekettik júıege ótkizý úshin bıyl 3,4 mlrd teńgeniń qurylysy júrgizilip jatqanyn aıtty.

Sonymen qatar aýdanda 11 eldi meken qatty otyndy paıdalandy. Bıyl Altyntóbe, Batys, Arǵymaq, Aqtas, Aqtas-2, Aqjar, Kókbulaq turǵyn alabtaryn tabıǵı gazben qamtý úshin qurylys jumystary qarqyndy júrýde. Al Yntymaq-2, Nurshýaq sh/a JSQ ázirlenýde, Qursaı, men Táýelsizdikke 20 jyl turǵyn alabyna jobalyq smetalyq qujat ázirleý 2022 jylǵa josparlanýda.

Aýdan ákimi tikeleı efır barysynda turǵyndar tarapynan kelgen 40-qa jýyq suraqqa jaýap berdi. Suraqtardyń basym bóligi tabıǵı gaz, sý, jaryq jáne qoǵamdyq kólik tóńireginde boldy.