Nurlan Nyǵmatýlın: Zańshyǵarýshylyq jumysta Parlamentke ótpegen partııalardyń usynystary únemi eskeriledi

Májilis Spıkeri Nurlan Nyǵmatýlınniń tóraǵalyq etýimen Parlament Májilisi janyndaǵy Partııaaralyq Keńestiń kezekti otyrysy ótti.

Otyrysty ashqan Palata Tóraǵasy Keńes jumysynyń basty maqsaty mańyzdy máseleler boıynsha parlamenttik jáne parlamenttik emes partııa ókilderimen birlesip, tıisti ortaq sheshimdi qabyldaý ekenin aıtty. Nurlan Nyǵmatýlın Májiliske ótpegen partııa ókilderi osy jerde ótip jatqan barlyq is-sharalarǵa belsendi qatysyp júrgenin alǵa tartyp: 

– Osy jolda biz jıi kezdespesek te, búgingi kúni barlyq partııa ókilderi, sonyń ishinde, Parlamentke kirmegen partııa músheleri, bizdiń zań shyǵarý jumysymyzǵa qatysyp, ózderiniń naqty usynystaryn jetkizip keledi. Osynyń barlyǵy, Memleket Basshysy Qasym-Jomart Kemeluly Toqaevtyń «Estıtin memleket» tujyrymdamasymen sáıkes keledi. Bul óte mańyzdy. Birinshiden, sol úshin, barshańyzǵa alǵysymyzdy bildiremiz. Ekinshiden, osy jumysty odan ári turaqty jalǵastyrýymyz kerek. Sebebi, ol halyqqa qajetti zań qabyldaý úshin de, parlamenttik emes partııalar jumysy úshin de tıimdi dep esepteımiz, – dedi.

Nurlan Nyǵmatýlın atap ótkendeı, VII shaqyrylymdaǵy Parlament jumysy bastalǵannan beri Májilistiń qaraýynda barlyǵy 128 zań jobasy boldy. Búginde onyń 80-i maquldanyp, Senatqa joldandy. Májiliske engizilgen barlyq 128 zań jobasy boıynsha Parlamentke enbegen partııalardyń ókilderi jumys toptaryna qatysa otyryp, tujyrymdamalyq usynystaryn beredi. Ol kóbine qoǵamda rezonans týdyrǵan zań jobalaryna, sonymen qatar ekonomıkalyq jáne áleýmettik sıpattaǵy zań jobalaryna qatysty.

Sonymen qatar, Palata Spıkeri depýtattardyń Memleket basshysy usynǵan saıası reformalardy zańnamalyq qamtamasyz etý jónindegi jumystaryn aıta kelip:

- Biz «Saılaý týraly» Konstıtýsııalyq Zańǵa ózgerister engizdik. Olar Prezıdenttiń Májiliske «ótý shegin» 7-den 5% - ǵa deıin tómendetý, saılaý bıýlletenderine «Barlyǵyna qarsy» baǵanyn engizý, sondaı-aq, aýyl ákimderiniń tikeleı saılaýyn engizý týraly usynystaryn iske asyrýǵa baǵyttalǵan, - dedi.

Májilis Tóraǵasy VII shaqyrylym depýtattary maquldaǵan zań jobalardyń ishinde el Prezıdenti bastamashylyq jasaǵan sheteldikterge jerdi satýǵa jáne jalǵa berýge tolyq zańnamalyq tyıym salýdy kózdeıtin Jer qatynastary máseleleri boıynsha zań jobasyn erekshe atap ótti. 

Is-sharada Nurlan Nyǵmatýlın «Qazaqstan Respýblıkasynyń sot júıesi men sýdıalarynyń mártebesi týraly» Konstıtýsııalyq Zańǵa ózgerister men tolyqtyrýlar, Ákimshilik quqyq buzýshylyq týraly kodekske ózgerister engizilgenine toqtaldy.

Depýtattar «Kvazımemlekettik sektordyń jekelegen sýbektilerin satyp alý týraly» zań jobasyn qarap, maquldady. Onda satyp alýdy júzege asyrýdyń qaǵıdattary men tásilderi, satyp alýǵa qatysýǵa baılanysty shekteýler, satyp alýdy josparlaý qaǵıdalary jáne áleýetti ónim berýshilerge qoıylatyn biliktilik talaptary aıqyndalady.

– Osy jáne basqa da zań jobalary boıynsha «Nur Otan», Qazaqstannyń Halyq partııasy jáne «Aq jol» partııalarynyń parlamenttik fraksııalary, sondaı-aq Qazaqstan halqy Assambleıasynyń depýtattyq toby jemisti eńbek etti. Osy jolda kóptegen usynystary zań jobalaý jumysynda kórinis tapqan «Aýyl», «Adal» partııalary men Jalpyulttyq sosıal-demokratııalyq partııasynyń belsendi ustanymdaryn atap ótkim keledi, – dedi Májilis Tóraǵasy.

Nurlan Nyǵmatýlın atap ótkendeı, qazirgi ýaqytta Májilis qorjynynda 41 zań jobasy bar. Olar: básekelestikti damytý, kásipkerlik qyzmet salasynda jańa retteýshilik saıasatty engizý, bıýdjettik zańnamany jetildirý,  bala quqyqtaryn qorǵaý,  volonterlik qyzmet, qaıyrymdylyq, memlekettik áleýmettik tapsyrys jáne úkimettik emes uıymdarǵa arnalǵan granttar týraly, sondaı-aq, sybaılas jemqorlyqqa qarsy is-qımyl máseleleri jáne taǵy basqalar. 

Otyrys barysynda Májilis Tóraǵasy saıası partııalardyń Palataǵa engiziletin zań jobalary boıynsha tujyrymdamalyq usynystaryn Keńes otyrysynda talqylaýdy usyndy.

Májilistiń baspasóz qyzmeti