Mańǵystaýlyq sheber respýblıkalyq baıqaýdyń jeńimpazy atandy

Jýyrda Qazaqstan qolónershiler odaǵynyń uıymdastyrýymen Almaty qalasynda respýblıkalyq «Sheber 2021» baıqaýy ótti. Oǵan Mańǵystaý oblysyndaǵy Quryq aýylynyń turǵyny Aqshagúl Qarymsaqova qatysyp, «Ulttyq mádenı brend» nomınasııasynyń jeńimpazy atandy. Bul týraly Qaraqııa aýdandyq kásipkerlik jáne ónerkásip bóliminiń basshysy Álııa Ábdihalyqova málim etti. 

Onyń aıtýynsha, qolóner jarysyna elimizdiń ár túkipirinen 100-den astam qolóner sheberi qatysqan. Fınalǵa 20 adam shyqty. Onyń onnan astamy túrli nomınasııa boıynsha júldeger atanǵan. 

-«Qazaqstan Respýblıkasy Ulttyq mýzeıi men «Shevron» kompanııasynyń qoldaýymen ótken «Sheber» baıqaýy el kóleminde 11-ret uıymdastyrylyp otyr. Saıysqa «Adaı rýhynyń tekemeti» dep atalatyn qolóner buıymymdy usyný arqyly fınalǵa shyqtym. Nátıjesinde «Ulttyq mádenı brend» nomınasııasyn jeńip aldym. Baıqaý joǵary dárejede ótip, sheberlik sabaqtary da uıymdastyryldy», - dedi Aqshagúl Qarymsaqova.

Qaraqııa aýdany ákimdiginiń baspasóz qyzmeti