Almatyda saýda oryndaryna "jasyl" statýsy barlar ǵana kire me? Bekshın jaýap berdi

Almatyda qazir saýda oryndaryna jumys kúnderi "jasyl" statýsy bar adamdar ǵana kiredi degen talap joq, alaıda qala dárigerleri Nur-Sultandaǵy epıdemıologııalyq jaǵdaıdy baqylaıdy. Bul týraly qalanyń bas sanıtar dárigeri Jandarbek Bekshın málimdedi.

Nur-Sultannyń bas sanıtar dárigeriniń jańa qaýlysyna sáıkes, 15 qarashadan bastap saýda jáne oıyn-saýyq ortalyqtaryna jumys jáne demalys kúnderi tek "jasyl" statýs alǵan adamdar ǵana kire alady.

Almatynyń bas sanıtar dárigeri eń aldymen Nur-Sultandaǵy epıdemıologııalyq jaǵdaıdy baqylaıtynyn jetkizdi.

– Nur-Sultanda osyndaı qaýly shyqty. Bul uzaq ýaqyt talqylandy. Saýda jáne oıyn-saýyq ortalyǵyna tek "jasyl" statýsy bar adamdardy kirgizýdi pılottyq sheshim dep ataýǵa bolady. Eger ol jaqsy nátıje kórsetse, árıne ári qaraı eldiń basqa óńirlerinde de engiziledi. Birneshe apta baqylaımyz, – dep jaýap berdi Bekshın.

Qazir Almatyda koronavırýsqa baılanysty epıdemıologııalyq jaǵdaı turaqtanyp jatyr. Qala qazir koronavırýstyń taralýy boıynsha "sary" aımaqta tur. Qalada ujymdyq ımmýnıtet 56%-dy quraıdy.

Búgin qalada Pfizer vaksınasyn salý bastaldy, al revaksınasııa 22 qarashada bastalady.

О́tken aptada ınfeksııa anyqtalǵan naýqastardyń 29%-y saýda oryndarynda, 21%-y qoǵamdyq kólikte, 22%-y otbasyda, 9%-y bazarda, 9%-y jumys ornynda juqtyrǵan.