EGov reseılik SBER kompanııasyna berilmeıtin boldy – Muhtar Taıjan

Qazaqstannyń EGov elektrondyq platformasy Reseılik SBER kompanııasyna berilmeıtin boldy. Bul týraly qoǵam belsendisi Muhtar Taıjan Facebook paraqshasynda habarlady.

Belsendi 9 qarasha kúni elordada Saraptamalyq keńestiń birinshi otyrysy ótkenin, kezdesýge kóptegen qazaqstandyq IT kompanııalar men ózi qatysqanyn málim etti.

Taıjan jıyn barysynda mınıstr Baǵdat Mýsın reseılik Sberbank Qazaqstandaǵy sıfrlandyrýmen aınalyspaıtynyn, eldigide eldiń sıfrlyq damýymen tek otandyq kompanııalar shuǵyldanatynyn aıtqanyn jetkizdi.

"Sáıkesinshe, Sberbankke Qazaqstan azamattarynyń eshqandaı jeke derekteri berilmeıdi. Sberbank eshqashan bizdiń derekter bazasyna qol jetkize almaıdy. Azamattardyń derekter bazasy tek Qazaqstan aýmaǵynda saqtalady. 500 mıllıon dollar (Qazaqstan úkimeti men Reseılik kompanııa arasyndaǵy kelisim quny - red) negizinen elde qalyp, aldaǵy 5 jylda otandyq IT kompanııalar men olardyń qyzmetkerlerine tólenedi. Olar ózimizdiń serverlik bazany ázirleýge tıis. Sıfrlandyrýdyń jańa baǵdarlamasy 5 jylǵa josparlanǵan" degen belsendi mundaı sheshim azamattyq qoǵam arqa synda júzege asqanyn jetkizgen.

Muhtar Taıjannyń málimdemesinde aıtylǵandarǵa baılanysty ázirge resmı aqparat shyqqan joq.

Buǵan deıin Qazaqstan premer-mınıstr Asqar Mamın men reseılik SBER kompanııalar tobynyń basshysy German Gref Qazaqstannyń sıfrlyq transformasııasy, sıfrlandyrýdyń platformalyq modeline jáne "Data-Driven Government" tujyrymdamasyna kóshý jónindegi jobalardy iske asyrý salasyndaǵy yntymaqtastyq týraly memorandýmǵa qol qoıǵan. Ol boıynsha reseılik kompanııa Qazaqstanǵa Data-Driven Government (derekter negizindegi úkimet) tujyrymdamasyn jasap berýge tıis bolǵan. Joba quny 500 mıllıon dollarǵa baǵalanǵan.

Qazaqstan úkimetiniń reseılik kompanııamen áriptes bolatyny qoǵamda narazylyqqa tap bolyp, bılik ótkir syn astynda qalǵan. Jobany synaýshylar eger úkimet SBER kompanııasymen kelisimge kelse, Qazaqstan sıfrlyq egemendigine qaýip tónetinin aıtady.