Výnderkınd Aqnazar Qajymurat ózine qol jumsaǵany habarlandy

20 jastaǵy výnderkınd Aqnazar Qajymurattyń oqys qazasyna baılanysty qosymsha aqparattar shyǵa bastady. Ulysmedia.kz saıty daryndy bala ózine qol salǵan bolýy múmkin ekenin jazady.

"2001 jyly 14 tamyzda dúnıege kelgen Qajymurat Aqnazar Armanulynyń qaıtys bolý sebebiniń aldyn ala boljamy – sýısıd. Máıit qonaqúıden tabyldy. Máıittiń janynan tabylǵan rıýkzak dári-dárimekke toly bolǵan" delingen habarlamada. 

Almaty qalalyq ishki ister departamenti bastyǵynyń birinshi orynbasary Rýstam Ábdirahmanov aqparatty rastamady, joqqa da shyǵarǵan joq.

– Qalalyq polısııa departamentine hat jazyńyzdar. Men telefon arqyly aqparatty rastap, ne joqqa shyǵara almaımyn,  – dedi Ábdirahmanov.

Polısııa departamentiniń baspasóz qyzmeti bul saýalǵa jaýap bermedi. 

Keshe, 5 qarasha kúni Almatyda joǵalǵan Aqnazar Qajymurattyń qaıtys bolǵany habarlandy.

Aqnazar Qajymurat Almatydaǵy fızıka-matematıka baǵytyndaǵy Nazarbaev zııatkerlik mektebiniń túlegi. ACT jáne SAT Subject Tests halyqaralyq emtıhandarynan súrinbeı ótip, eń joǵary upaı jınaǵan.

Sonyń arqasynda Amerıkanyń kez kelgen úzdik joǵary oqý ornyn tańdaýǵa múmkindik alǵan. Ol Garvard ýnıversıtetiniń grantyn alǵan.