Áleýmettik sala qyzmetkerlerine qurmet kórsetildi

Shymkentte áleýmettik qorǵaý júıesi qyzmetkerleri kúnine arnalǵan saltanatty shara uıymdastyryldy.

Qalada jumyspen qamtý jáne áleýmettik qorǵaý basqarmasyna qarasty 10 mekemede 1200-ge jýyq áleýmettik qyzmetker jumys isteıdi. Búginde shaharda erekshe kútimdi qajet etetin 2 176 azamat bolsa, onyń 438-si balalar. Mekeme mamandary osyndaı jandarǵa arnaıy áleýmettik qyzmet kórsetýde.

Bıyl qalanyń áleýmettik salasynda aýqymdy jumystar atqaryldy. Arnaıy-áleýmettik ortalyqtardyń materıaldyq-tehnıkalyq bazasy nyǵaıtylyp, múmkindigi shekteýli jandar úshin «Teń qoǵam» ortalyǵy ashyldy.

Merekelik jıynda basqarma basshysy Balmarjan Narbekova áleýmettik qyzmetkerlerdi kásibı merekemen quttyqtap, eren eńbekterine alǵys aıtty.

– Búginde halyqtyń áleýmettik ahýalyn kóterip, turmysyn túzetý memlekettiń basty mindetterdiń biri. Bul salany damytýǵa memleketten qoldaý da jetkilikti. Buqaranyń sol kómektiń sharapatyn sezinip, múmkindikti múlt jibermeı paıdalanýy áleýmettik sala qyzmetkerleriniń sapaly qyzmetine tikeleı baılanysty. Sebebi, áleýmettik jumystyń salmaǵy ózgege bilinbeıtin, biliktilikpen birge keń júrekti qajet etetin kúrdeli sala,-dedi B.Narbekova.

Merekelik basqosýda birqatar áleýmettik qyzmetkerge qala ákimi M.Áıtenovtiń, qalalyq máslıhaty men «Nur Otan» partııasynyń «Alǵys haty» tabystaldy. Saltanatty kesh óner maıtalmandarynyń konserttik baǵdarlamasyna jalǵasty.