Shymkentte 273 azamat qonys toıyn toılady

Shymkent qalasynda «Shańyraq» jeńildetilgen nesıelik baǵdarlamasy boıynsha Turan shaǵynaýdanynda ornalasqan 7 turǵyn úı qoldanysqa berildi. Saltanatty sharaǵa qala ákiminiń orynbasary M.Aımanbetov qatysyp, ınfraqurylymdyq kommýnaldyq qyzmetteri iske qosylǵan páterlerdiń ıelerine kiltterin tabystady.

- Turan shaǵynaýdanynda shamamen 1,2 mln. sharshy metrdi quraıtyn 15300 páterli 319 kópqabatty turǵyn úıdiń qurylysy josparlanǵan. Búgingi tańda bıýdjet esebinen 88 úıdiń qurylysy júrgizilip, onyń ishinde «Shańyraq» baǵytynyń qatysýshalyryn 27 turǵyn úıge qonystandyrý kezeń-kezeńimen júzege asyrylýda. «7-20-25» nesıelik baǵdarlamasy boıynsha 29 turǵyn úıdiń qurylysy bıyl aıaqtalmaq. Nesıelik baǵyttaǵy taǵy 50 turǵyn úıdiń jobalaý-smetalyq qujattamasy ázirlenýde. Olardyń qurylys jumystary keler jyly bastalady. Bul kórsetkishter aldaǵy ýaqytta azamattardyń baspana máselesiniń sheshilýine úlken yqpal etpek, -dedi qala ákiminiń orynbasary.

Bıyl qala ákimdigi tarapynan baspanaǵa muqtaj azamattarǵa qoldaý retinde turǵyn úı sertıfıkatyna 500 mıllıon teńge bólindi. Ipotekalyq turǵyn úı qaryzy boıynsha bastapqy jarnanyń bir bóligin jabý úshin qaıtarymsyz negizde ár azamatqa 1 mıllıon teńgege deıin beriledi. Búgingi jańa qonys ıeleriniń 184-i de atalǵan sertıfıkatty alyp, baspanaly bolyp otyr.

«Shańyraq» baǵdarlamasy arqyly kópten kútken baspanasyna qol jetkizgen turǵynnyń biri – Bahytkúl Nurmetova. Ol eki balany asyrap otyrǵan jalǵyzbasty ana. Osydan birneshe jyl buryn turǵyn úı kezegine memlekettik qyzmetker sanatymen tirkelgen eken.

Atalǵan baǵdarlama boıynsha jyl sońyna deıin ınfraqurylymdyq kommýnaldyq qyzmetteri qosylǵan taǵy 14 úı paıdalanýǵa beriledi.