Almatynyń kásiporyndarynda ujymdardy vaksınalaý qajettiligi túsindirilýde

Almaty ákimi Baqytjan Saǵyntaevtyń tóraǵalyǵymen koronavırýs ınfeksııasynyń taralýyna jol bermeý jónindegi qalalyq jedel shtabtyń otyrysy ótti.

Habarlanǵandaı, aǵymdaǵy jyldyń 7 qyrkúıeginde QR aýmaǵynda koronavırýs ınfeksııasynyń taralýyna jol bermeý jónindegi Vedomstvoaralyq komıssııa vaksınalaý boıynsha reıdter algorıtmin bekitken bolatyn.

Almatynyń monıtorıngtik toptary 10 qyrkúıekten bastap 302 bıznes nysany men megapolıstiń joǵary oqý oryndaryn tekserdi. Bularda 65 536 qyzmetker bar, olardyń 55 618-i (84,8%) vaksınalanǵan, 4 439-y (6,8%) ekpe almaǵan, aýyryp jazylǵandar nemese medısınalyq qarsy kórsetilimderi barlar – 5 479 (8,4%).

Barlyq kásiporyndarda koronavırýsqa qarsy vaksınalanýdyń qajettiligi men mańyzy týraly áńgimeler júrgizildi, óıtkeni vaksınalanbaǵan qyzmetkerlerdiń basym bóligi ujymdarda derttiń kezekti ýshyǵýyna ákelýi múmkin.

11-17 qazan aralyǵyndaǵy ótken aptada monıtorıngtik toptar 35 kásiporyndy tekserip, 12 541 adamdy qamtydy. Olardyń ishinde 9987 adam vaksınalanǵan, 1240-y ekpe almaǵan, 1314 adamnyń medısınalyq qarsy kórsetilimderi bolǵan.

Tekserýshiler monıtorıng barysynda medısınalyq qarsy kórsetilimderi bar qyzmetkerler arasynda bekitilgen 026-Ý formasynyń sáıkessizdigine baılanysty birqatar buzýshylyqtar anyqtalǵanyn atap ótti, sondyqtan medısınalyq anyqtamalardyń durystyǵyn tekserý úshin sharalar qabyldanatyn bolady. Onyń ústine, Almatyda birqatar saýda-oıyn-saýyq ortalyqtary men saýda úıleri qyzmetkerleriniń Ashyq-tyń «kók» mártebesi boıynsha jumys isteıtini, olardyń áli kúnge deıin «jasyl» mártebeni almaǵany anyqtaldy.

Respýblıkalyq elektrondyq densaýlyq saqtaý ortalyǵynyń Almaty fılıaly usynǵan vaksınalaný Kartasynyń negizinde qyzmetkerler sany 50 adamnan asatyn jáne vaksınalanǵan qyzmetkerlerdiń sany 60%-dan tómen kásiporyndarda vaksınalaý jospary jasaldy.

Eske salsaq, 17 qazannan bastap Densaýlyq saqtaý mınıstrliginiń buıryǵy kúshine endi, oǵan sáıkes vaksınalanǵan, vaksınalanbasa da (jeti kúnde bir ret) PTR-testisi jáne turaqty medısınalyq qarsy kórsetilimi jóninde anyqtamasy bar nemese úsh aı ishinde KVI-men aýyrǵan qyzmetkerlerge jumys isteýge ruqsat etiledi.

Almaty Kásipkerler palatasynyń dırektory A. Qoshmambetov habarlaǵandaı, «Atameken» KVI pandemııasymen kúresýdiń jalǵyz quraly retinde halyqty jappaı vaksınasııalaý qajettiligin qoldaıdy. Densaýlyq saqtaý mınıstrliginiń jańa buıryǵyn talqylaý kezinde «Atameken» saraptamalyq qorytyndyda óz ustanymyn bildirdi. Jalpy, Kásipkerler Palatasy kásiporyn basshylarynan ujymdardy vaksınalaýǵa barynsha kómek kórsetýdi jáne jaǵdaı jasaýdy suraıdy.

Budan ózge, aǵymdaǵy jyldyń 28 shildesinen bastap jolaýshylar men qoǵamdyq kólik júrgizýshilerin tekserý jalǵasýda. Tekserýdiń barlyq kezeńinde 1 618 avtobýs pen trolleıbýsqa monıtorıng júrgizildi, onyń ishinde ótken aptada – 283 kólik birligi.

Qoǵamdyq kólikte betperde rejımin saqtamaǵany úshin QR ÁQBtK-niń 425-babynyń 1-bóligine sáıkes 224 jeke tulǵaǵa jáne bir zańdy tulǵaǵa ákimshilik hattamalar toltyryldy. Onyń ishinde ótken aptada 11 jolaýshy jaýapkershilikke tartyldy.

Qoǵamdyq kólikte betperde taǵý ınfeksııa qaýpin azaıtatyny belgili. Infeksııany azaıtý úshin túngi ýaqytta qoǵamdyq kólik salondaryn dezınfeksııalaý uıymdastyryldy.

Derttiń tómendeýine qaramastan epıdemıologııalyq ahýal burynǵydaı kúrdeli bolyp qalýda. Kún saıyn qalada 300-den astam KVI juqtyrǵandar anyqtalady, ınfeksııalyq stasıonarlarda 1368 adam, onyń ishinde 28 bala bar.

Sondyqtan mamandar Almaty turǵyndary men qonaqtaryn áleýmettik qashyqtyq pen betperde taǵý erejelerin qatań saqtaýǵa shaqyrady. Aıta keterligi, derttiń ósýin toqtatýdyń jalǵyz ári tıimdi ádisi – vaksınalaný arqyly ujymdyq ımmýnıtetti qalyptastyrý.