Shymkentte áleýmettik máni bar azyq-túlik ónimderiniń baǵasy turaqty

Áleýmettik máni bar azyq-túlik taýarlary boıynsha baǵa turaqtylyǵyn saqtaý maqsatynda Shymkent qalasynyń ákimdigi tarapynan О́ńirlik turaqtandyrý qoryna 4,7 mlrd. teńge baǵyttaldy. «Aınalym shemasyna» sáıkes, 16 qazandaǵy jaǵdaı boıynsha 5,4 mlrd. teńge aınalymǵa túsip, qalamyzda maqsatty deńgeı 114,9 paıyzǵa oryndaldy. Bul týraly senbi kúni QR Premer-mınıstri A.Mamınniń tóraǵalyǵymen ótken selektorlyq májiliste elimizdiń Saýda jáne ıntegrasııa mınıstri Baqyt Sultanov málimdedi.

Nátıjesinde 20 myń tonnadan astam áleýmettik máni bar azyq-túlik taýarlaryna satyp alýlar júrgizildi. Bul sanattaǵy azyq-túlik taýarlarynyń qataryna 19 ónim túrleri jatady: un, nan, makaron ónimderi, tuz, jumyrtqa, qaraqumyq, kúrish, qant, kúnbaǵys maıy, sary maı, sıyr jáne qus eti, sút, aıran, súzbe, kartop, sábiz, pııaz, qyryqqabat.
О́tken aptada kórsetilgen azyq-túlik taýarlaryna baǵa turaqtylyǵy saqtaldy. Kúrish, sábiz, pııaz, shekerdiń baǵalary 0,3–3,7 paıyz aralyǵynda tómendegen.

«Aınalym shemasyna» qalamyzdaǵy iri saýda jelileri tartylǵan. Saýda ortalyqtary deldaldyq uıymdardyń qatysýynsyz operatormen tikeleı kelisimshartqa otyrǵan. Operator kelisimshart talaptarymen bekitilgen sharttardyń oryndalýyn baqylap, monıtorıng júrgizedi. Júıe sheńberinde operator da, saýda ortalyqtary da kelisimshart talaptaryn saqtaı otyryp, baǵany osy qujatta aıqyndalǵan deńgeı kóleminde saqtalýyna kepil bolady.

Qalamyzda qazir mundaı kelisimsharttar «Magnum Cash & Carry», «GraMad Hypermarket», «Fırkan» saýda jelilerimen túzilgen. Búl júıeniń tıimdiligi eskerilip, aýyl sharýashylyq ónimderine forvardtyq kelisimsharttar túzý josparlanǵan.