Shymkent qalasynda jastarmen prezıdent joldaýy talqylandy

Qazaqstan Respýblıkasynyń Prezıdenti Qasym-Jomart Toqaevtyń 2021 jyldyń 1 qyrkúıeginde jarııalaǵan «Halyq birligi jáne júıeli reformalar - el órkendeýiniń berik negizi» atty Qazaqstan halqyna arnaǵan kezekti Joldaýyn turǵyndarǵa túsindirý, nasıhattaý maqsatynda Shymkent qalalyq ákimdigi janynan úgit-nasıhat toby qurylǵan.

Osy toptyń múshesi, «Dýstlık» Qazaqstan ózbekteri qaýymy Shymkent ýnıversıtetinde stýdenttermen kezdesip, Prezıdent Joldaýy tóńireginde áńgime qozǵady. I.Hashımjanov Memleket basshysy Joldaýda bilim salasyna jan-jaqty qoldaý kórsetý úshin Úkimetke arnaıy tapsyrmalar júktegenin atap ótti.

Sonyń ishinde Ǵylym týraly zańnamaǵa jyl sońyna deıin túzetýler engiziletinin, ǵylymı-zertteý jumystaryn granttyq qarjylandyrý merzimi 5 jylǵa uzartylǵanyn, sonymen qatar, pedagogtardyń biliktiligin arttyrý ýaqyty 3 jyldyq merzimge qysqarǵanyn baıandady.

- Prezıdenttiń «Mınıstrlik bilimdi qazirgi zamanǵa beıimdeýi qajet», «bizge bilikti mamandar kerek» degen sózderi tutastaı bilim salasynyń jaýapty mamandaryna úlken mindetter júkteıdi. Aıtalyq QR Prezıdenti ótken jyly Úkimetke Pedagog mártebesin jáne muǵalimderdiń jalaqysyn arttyrýdy, otandyq ǵalymdarǵa erekshe nazar aýdarýdy, bilim berý salasyn jan-jaqty qoldaýdy tapsyrǵan bolatyn. Sol josparlar birtindep oryndalyp keledi. Endigi maqsat bilimge qatysty Joldaýda aıtylǵan tapsyrmalardy iske asyryp, aǵartýshylyq salany álemniń ozyq elderiniń terezesimen teńestirý, - dedi I.Hashımjanov.

Mazmundy ótken jıyn sońynda Shymkent ýnıversıtetiniń áleýmettik jáne tárbıe isteri jónindegi prorektor Djanabaev Dáýren kezdesýden jastar mol taǵylym alǵanyn jáne Joldaýda aıtylǵan sózder stýdentterdiń bilimge qushtarlyǵyn oıatyp, elimizdi bolashaǵy jolynda aıanbaı eńbek etýge jigerlendiretinine zor senim bildirdi.