Jalpyulttyq birlik basymdyqtary aıqyndaldy

Memleket basshysy Qasym-Jomart Toqaevtyń tóraǵalyǵymen Qazaqstan halqy Assambleıasy Keńesiniń keńeıtilgen otyrysy ótti. Beınekonferensııalyq baılanys arqyly onlaın formatta ótken májiliske qala ákimi, qalalyq assambleıa tóraǵasy Murat Áıtenov qatysty.

Jıyn barysynda jalpyulttyq birlik pen qoǵamdyq kelisim salasynda Túrkistan oblysynda atqarylǵan jumystar, Qazaqstan halqy Assambleıasy janyndaǵy Analar keńesiniń qyzmet tájirıbesi baıandaldy.
Bilim berý, aqparattyq saıasat júrgizý, ashyq qoǵam qurý, jastarymyzdy ınternet keńistiktiń zııandy kontentinen qorǵaý, balalar sporty men shyǵarmashylyǵyn damytý, kópbalaly analardy áleýmettendirý, telearnalarda otandyq anımasııalyq ónimder úlesin arttyrý, jetkinshekterge arnalǵan teleónimder kórsetý máseleleri jóninde usynystar aıtyly, qoldaý tapty.

Qala halqynyń 30 paıyzdan astamyn etnos ókilderi quraıdy. Qalalyq Qazaqstan halqy Assambleıasy janynan 17 etnomádenı birlestik qyzmet etetip, jalpyulttyq birlik pen qoǵamdyq kelisimniń jarqyn úlgisin kórsetip keledi.

Assambleıaǵa júktelgen mindetter sheńberinde qalalyq jáne aýdandyq deńgeılerde Qoǵamdyq kelisim jáne Analar keńesteri, Medıasııa keńesi, Ǵylymı-sarapshylyq top, Jýrnalıster men blogerler klýby, Jastar qoǵalysy, barlyǵy 8 qoǵamdyq qurylym qyzmet etedi.

Qalalyq assambleıa tarapynan jyl basynan beri 87 is-shara, 59 kezdesý, 23 lektorıı, 19 qoǵamdyq qabyldaý, 14 semınar uıymdastyrylyp, ótkizilgen. Epıdemıologııalyq ahýal eskerilip, bul is-sharalardyń basym bóligi onlaın formatta ótken.

Respýblıkalyq Assambleıa Keńesiniń otyrysyn Memleket basshysy qorytyndylap, memlekettik etnosaralyq saıasatty ilgeriletý, Qazaqstan halqy Assambleıasy ınstıtýtyn odan ári nyǵaıtý jóninde birqatar mańyzdy mindetterdi belgiledi.

Salany jetildirýge baǵyttalǵan bul tapsyrmalar qalalyq assambleıa músheleriniń aldaǵy jumys basymdyǵy bolyp aıqyndaldy. Bıyldan bastap qalalyq Qazaqstan halqy Assambleıasy derbes ǵımaratyna ıe boldy. Dostyq úıi retinde qyzmet etetin bul ortalyq qazaqstandyq birlik pen biregeılikti nyǵaıtý baǵytyndaǵy qyzmetin jalǵastyrady.