Týrızm Shymkent ekonomıkasyna serpin beredi

Búgin Shymkent qalasy Týrızm jáne syrtqy baılanystar basqarmasynyń basshysy Erlan Qydyrov basqarma tarapynan 9 aıda atqarylǵan jumystar boıynsha baspasóz máslıhatyn ótkizdi. Qazirgi tańda Shymkent qalasy Týrızm jáne syrtqy baılanystar basqarmasy marketıngtik ilgeriletý, týrıstik ınfraqurylymdy jetildirý, «Kreatıvti ındýstrııany» damytý, syrtqy baılanystardy damytý jáne yntymaqtastyqty nyǵaıtý sekildi 4 baǵytta jumys jasaýda.

Erlan Ermekuly óz sózinde Shymkent qalasynyń qazirgi tańda Qazaqstannyń 8 óńirimen jáne 4 halyqaralyq baǵytta tikeleı áýe qatynasy bar ekenin atap ótti.
Aǵymdaǵy jyldyń 6 aı qorytyndysy boıynsha qalamyzǵa 158 224 týrıst kelgen. Sáıkesinshe, qala ekonomıkasyna túsken tabys kólemi 9,5 mlrd. teńgeni quraǵan. Jyl sońyna deıin bul kórsetkishti 2 esege arttyrý, ıaǵnı 19 mlrd. teńgege jetkizý josparlanyp otyr. Al, byltyr Shymkent qalasyna kelýshi týrıst sany 213 394 adamdy qurap, týrızm salasynan qala ekonomıkasyna túsken tabys kólemi 12,8 mlrd. teńgege jetken bolatyn.

Úshinshi megapolıstiń kórikti jerlerimen tanystyrý maqsatynda qańtar aıynda ashylǵan «Visit Shymkent» týrıstik-aqparattyq ortalyǵy jyl basynan beri ázirlengen 17 marshrýt boıynsha 115 tegin ekskýrsııa uıymdastyryp, 11 myńǵa jýyq týrıstke qyzmet kórsetti. Ortalyq bazasynda qaladaǵy halyq kóp shoǵyrlanatyn núktelerde 7 aqparattyq kıosk ornalastyrylǵan. Al, týrısterdi aqparatpen qamtamasyz etý maqsatynda iske asqan VISIT-SHYMKENT.KZ týrıstik portaly men mobıldi qosymshasyna qazirgi tańda qala aýmaǵyndaǵy 700-den asa týrıstik sala ókilderi men nysandary engizilip, portal arqyly túrli mádenı nysandarǵa 38 414 bılet satyp alynǵan.

Týrıstik salany damytý baǵdarlamasyna sáıkes, sheteldik týrısterdi tirkeý, esepke alý, týrıstik aǵyndy taldaý jáne kóshi-qon baqylaýyn júzege asyrýǵa baǵyttalǵan «E-Qonaq» elektrondy júıesi Qazaqstan boıynsha iske qosylǵan bolatyn. Búginde bul júıe Shymkent qalasyndaǵy 65 qonaq úıde ornatylǵan. Basqarma aldaǵy ýaqytta qalanyń tanymdylyǵyn arttyryp, týrıstik aǵyndy arttyrý maqsatynda birqatar jobalardy iske asyrmaq.

Shymkent qalasynyń Aqparattyq-kommýnıkasııalyq ortalyǵy