"Jaǵdaıy aýyr". Penjimdegi qaqtyǵysta jaraqat alǵan oqýshynyń jaǵdaıy belgili boldy

Almaty oblysy Panfılov aýdanynyń Penjim aýylynda mektep oqýshylary arasyndaǵy janjalda jaraqat alǵan 16 jastaǵy jasóspirimniń jaǵdaıy belgili boldy.

"2005 jyly týǵan bala 27 qazanda Panfılov aýdanaralyq kópsalaly aýrýhanasyna tústi. Naýqastyń jalpy jaǵdaıy aýyr, ashyq bas súıek-mıdyń aýyr jaraqatyn alǵan" delingen Almaty oblystyq Densaýlyq saqtaý basqarmasynyń baspasóz qyzmeti taratqan habarlamada.

Jasóspirim 2-3 dárejeli travmatıkalyq shok alǵan. Esi bar.

27 qazanda Panfılov aýdanynyń ortalyq aýrýhanasyna Penjim kentiniń mektebi aýmaǵynan dene jaraqatymen 16 jastaǵy jasóspirim túsken. Tekserý barysynda jaraqatqa 9-10-synyp oqýshylary arasyndaǵy tóbeles sebep bolǵany anyqtaldy.

Atalǵan fakti boıynsha, QR QK 106-baby 2-bóligi (Densaýlyqqa qasaqana aýyr zııan keltirý) boıynsha qylmystyq is qozǵaldy.

Oqıǵaǵa baılanysty áleýmettik jelide túrli vıdeo men rastalmaǵan aqparat tarap jatyr. Bir vıdeoda mektep aýlasynda oqýshylar tóbeleskeni kórinse, kelesi vıdeo túngi ýaqytta túsirilgen. Ol jerden bir top jasóspirimniń arly-beri júrgenin, turǵyndardyń úreıli daýsyn, dúken órtenip, kólik terezeleriniń synǵanyn baıqaýǵa bolady.

Sondaı-aq áleýmettik jelide kıkiljińniń ultaralyq sıpaty bary týraly aqparat shyǵyp jatyr. Rastalmaǵan derekter boıynsha qazaq-uıǵyr jastary arasynda qaqtyǵys bolǵan.

Polısııa departamenti taratqan habarlamada ol týraly eshteńe aıtylmaıdy.