Foto: adebiportal.kz
Halyqaralyq "Alash" syılyǵynyń ıegeri, jazýshy, dramatýrg Sofy Smataev qaryzǵa kirip ketkenin aıtyp, 20 myńnan astam kitabyn satatynyn málim etti. Qalamger Express Qazaqstan saıtyna 5 mıllıon teńge qajet ekenin aıtqan.
Jazýshy 25 tomdyq kitabyn 12 myńǵa berýge daıyn. Dese de jazýshynyń kitabyn alatyn adam tabylmaı jatyr eken.
– Kitap ótpeı jatyr. Oıbaılap jatyrmyn, aıqaılap jatyrmyn, eshkim almaıdy. Ákimderge jazdym, mádenıet basqarmasyna jazdym. Bir jıyntyǵyn alady, boldy. Almatyda kitabymdy alamyn degen 100 adam bar. Biraq bireýi de kelgen joq. О́tirik aıtady. Dúkenderde meniń kitaptarym 50 myńnan tur. Al men 12 myńnan beremin dedim. Sonda da eshkim alatyn emes. Áıelimniń basyna tas qoıýǵa 5,5 mıllıon teńge kerek. Men soǵan qaryzdanyp júrmin, – dedi jazýshy.
Jazýshynyń jary Shámshııa Smataeva osy jyldyń jazynda qaıtys bolǵan. Dramatýrg marqum áıeliniń zıratyn turǵyzý úshin biraz shyǵyndalǵanyn aıtady.
– Túbi áıeliminiń qasyna baramyn ǵoı. Jatatyn jerdi qazir durystap qoıýýym kerek. Aqsha maǵan sol úshin qajet. 25 tom tur. "Elim-aı", "Jarylǵap batyr", "Bulaq", "Máńgilik bastaýy" degen on romanym bar. 25 kitapty 12 myńǵa baǵalap otyrmyn. Onyń 4 tomy dramatýrgııa, 5 tomy poezııa, 1 tomy fılosofııalyq esse, – dedi Sofy Smataev.
Qalamger Jazýshylar odaǵynan da, úkimetten qaıran bolmaı jatqanyn jetkizdi.
– Jazýshylar odaǵynan 80-ge kelgenshe bir maqtaý qaǵaz alǵan joqpyn. Olar meni ıttiń etinen de jek kóredi. Qazaq jazýshylary arasynda 25 tomdyqty jazǵan eshkim joq. Muhtar Áýezov 17-aq tom jazdy. Ilııas Esenberlın de 17 tom jazdy Ábdijámil Nurpeıisov tipti 8-aq tom jazdy. Ǵabıt Músirepov te 8 tom jazdy. Dese de 25 tomdy 12 myńǵa eshkim almaıdy. Úkimet 30 jylda meniń bir kitabymdy shyǵarǵan joq. Barlyǵyn óz kúshimmen shyǵaryp kele jatyrmyn, – dedi dramatýrg.
Sofy Smataev 1941 jyly Qaraǵandy oblysy, Aqadyr aýdanynda dúnıege kelgen. 80-nen asqan jazýshy "Qurmet", "Parasat" ordenderimen marapattalǵan.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir