«Indetpen kúresý – memlekettiń ǵana emes, ár azamattyń boryshy»

«Elim úshin egilemin» azamattyq shtabynyń ókilderi Shymkenttegi jumys saparyn qorytyndylady. QR Premer-Mınıstri orynbasarynyń baspasóz hatshysy, QR Densaýlyq saqtaý mınıstrligi sanıtarlyq-epıdemıologııalyq baqylaý komıtetiniń resmı ókili Erjan Baıtanaev jáne Shymkent qalasy ishki saıasat jáne jastar isteri jónindegi basqarmasy basshysynyń orynbasary Beksultan Ádilhanov qalalyq ákimdiktiń aqparattyq-kommýnıkasııa ortalyǵynda baspasóz brıfıngin ótkizdi. Jıynǵa belgili epıdemıolog maman Aınagúl Qýatbaeva Nur-Sultan qalasynan Zoom konferensııasy arqyly onlaın qosyldy.

Erjan Halıuly koronavırýs pandemııasymen kúresý memlekettiń ǵana emes, ár azamattyń da boryshy ekenine toqtalyp, bul turǵyda vaksına alýdyń mańyzdylyǵyna toqtaldy.

– Elimiz boıynsha koronavırýsqa qarsy vaksına alý naýqany aqpan aıynda bastaldy. Osyǵan oraı azamattyq shtab qurylyp, onyń músheleri eldiń ár óńirin aralap júr. Mundaǵy maqsat – vaksınaǵa qatysty jekelegen azamattardyń ǵana emes, jalpy baılanys platformalary arqyly kópshiliktiń saýaldaryna jaýap berý, ekpe alý týraly túsindirý. Mysaly, ótken táýlikte elimiz boıynsha vırýs juqtyrǵan degen kúdikpen tirkeýge alynǵan azamattardyń 98 paıyzy vaksına almaǵan. Bul tusta este ustaıtyn jaıt – vaksına vırýstan tolyq qorǵamaıdy, tek vırýs juqqan jaǵdaıda jeńil ótedi. Al revaksına jospar boıynsha qarasha aıynyń úshinshi onkúndiginde bastalady dep josparlap otyrmyz, – dedi Erjan Baıtanaev.

Shtab ókili vektorly vaksına alǵan azamattar 9 aıdan keıin ınaktıvti ekpeniń 1 dozasyn, al ınaktıvti vaksına alǵan azamattar 6 aıdan keıin vektorly vaksına ala alatyndaryn aıtty. Al Phiser vaksınasyn óndirýshilermen kelissóz júrip jatyr. Sátti aıaqtalsa, ol vaksına jyldyń IV toqsanynda jetkizilýi múmkin.

Erjan Qalıulynyń aıtýynsha, elimizdiń 11,4 mln azamaty vaksına ala alady. Mamandar ekpe alýdyń nátıjesi boıynsha jazdaǵy epıdemıologııalyq jaǵdaıǵa qaraǵanda kúzdegi ahýaldyń edáýir jaqsarǵanyn alǵa tartty.

Brıfıng barysynda shtab ókilderi BAQ tilshileriniń suraqtaryna jaýap berdi.

Nýrlan Bektaev