Aımaǵambetov: Muǵalimderdi kóshe sypyrýǵa jibergender jazalanady

Semeı qalasynda oqý prosesine kedergi keltirip, muǵalimderdi kóshe sypyrýǵa jibergen oqıǵaǵa qatysty bilim mınıstri Ashat Aımaǵambetov pikir bildirdi. Bul týraly mınıstr Facebook paraqshasynda málimdedi.

– Semeı qalasynda oqý prosesine kedergi keltirip, muǵalimderdi kóshe sypyrýǵa jibergen. Shamasy, mundaı tapsyrmany qala ákiminiń orynbasary berip, osyndaı mazmundaǵy hat mektepterge taratylǵan. 2019 jyldyń jeltoqsanynda qabyldanǵan Zań sheńberinde pedagogterdi ózine qatysty emes qyzmetterge tartýǵa tyıym salynady. Sodan beri muǵalimder tek tikeleı fýnksıonaldyq mindettermen aınalysýy kerek ekenin túsiný úshin ýaqyt jetkilikti boldy, – dedi mınıstr.

Ol osyndaı áreket úshin tártiptik jáne ákimshilik jaýapkershilikke tartýdan bastap jumystan shyǵarýǵa deıin 200-ge jýyq basshy jazalanǵanyn eske saldy.

– Semeı qalasyndaǵy oqıǵaǵa baılanysty bilim berý salasyndaǵy sapany qamtamasyz etý departamenti ákimshilik is qozǵap, tekserý júrgizip jatyr. Qala ákimi orynbasarynyń osy jaǵdaıǵa qatysy rastalsa, bul laýazymdy tulǵa jáne ózge tulǵalar ákimshilik jaýapkershilikke tartylady. Sondaı-aq, qajet sharalar qabyldaý úshin Memlekettik qyzmet isteri agenttigine júginemiz. Sonymen qatar, qalalyq bilim bólimi basshysy da jaýapkershilikke tartylady, –  dedi mınıstr.

Buǵan deıin Semeı turǵyny mektep muǵalimderi sabaq ótkizýdiń ornyna senbilikte kóshe tazalap jatqan sýretter jarııalaǵan bolatyn.