Jańa maýsym: Áýezov teatry áıel ómiri men Keńes úkimetiniń zardaby týraly qoıylymdar usynady

Keshe, 13-qazanda Muhtar Áýezov atyndaǵy Qazaq ulttyq drama teatrynyń 96-maýsymy ashyldy. Soǵan oraı baspasóz máslıhaty ótip, "Sahna sátteri" fotokórmesi uıymdastyryldy. Al jańa maýsym shymyldyǵy ádettegideı Muhtar Áýezovtiń shyǵarmasymen túrildi.

Teatr ujymy jýyrda ǵana Aqmola jáne Soltústik Qazaqstan oblystarynan gastroldik sapardan oralǵan. О́ner ujymynyń basshysy Erkin Jýasbek bul jolǵy sapar kórermenmen qaýyshýǵa asyǵyp, olardyń ystyq yqylasyn saǵynyp qalǵan ártister úshin erekshe oqıǵa bolǵanyn aıtady. Karantın shekteýlerine baılanysty zaldy kórermenge lyq toltyrýǵa múmkindik bolmaǵan. Alaıda qoıylym tamashalaǵysy kelgenderdiń kóp bolýyna baılanysty kúnine eki spektakldan qoıylyp otyrǵan.

Teatr kórermender úshin bıylǵy maýsymda kóptegen jańa spektaklder ázirlep otyr. Olardyń ishinde eki premera jańa jylǵa deıin ótedi dep josparlanǵan. Qarasha aıynda Ábdijámil Nurpeıisovtyń "Qan men ter. Aqbala" spektakli, al jeltoqsan aıynda jazýshy Rahmetolla Raıymqulov áńgimesiniń jelisimen sahnalyq nusqasyn dramatýrg Dýlat Isabekov jazǵan "Mashqar túngi mahabbat" qoıylymy kórermenge jol tartpaq.

Teatr dırektory Erkin Jýasbek áıgili "Qan men ter" týyndysy bul joly sahnada jańa qyrynan ashylyp, onda búgingi zaman kózqarasy kórinis tabatynyn jetkizdi.

 

Qamshy tilshisiniń "mundaı ıdeıaǵa sońǵy ýaqytta femınıstik qozǵalystardyń belsendi bola túsýi, áıel quqyǵy máselesi qoǵamda jıi qozǵalyp júrgeni áser etti me" degen saýalyna "mundaı qozǵalystar álbette áser etedi" dep jaýap berip, teatr qoǵam tynysy men suranysyn udaıy jiti qadaǵalap otyratynyn atap ótti.

– Áıel – qoǵamnyń qozǵaýshy kúshi. Negizinen áıel aıaýly jar, ardaqty ana róline beriledi de óziniń jeke taǵdyryna, qalaýyna, tańdaýyna núkte qoıyp jatady. Al sol eki ortany jalǵaı alý, sol jolda kúresý ne bolmasa sodan zardap shegý – qaı zamanda da problema, – deıdi Erkin Jýasbek. Qoıylymdy rejısser Árıdash Ospanbaeva sahnalaıdy.

Al "Mashqar túngi mahabbat" qoıylymy qazaq qandas, oralmen degen kúıge qalaı tústi, atamekenin nege tastap ketýge májbúr boldy degen saýaldarǵa jaýap izdeı otyryp, Keńes úkimetiniń adamdardy qanǵa bóktirgeni, jerin tartyp alyp, erkindiginen aıyrǵany týraly bolmaq. Rejısseri – Juldyzbek Jumanbaı.

 

Baspasózge arnalǵan jıynnan soń jýrnalıster teatr tarıhynan syr shertetin "Sahna sátteri" kórmesimen tanysty.

Kórmege ártisterdiń sahna ústindegi jarqyn oınyn, emosııasyn kórsetetin baspasózde basyla bermeıtin sırek sýretter qoıylǵan. Olardyń arasynda 40 jyldyq tarıhy bar fotolardan bastap, teatrdyń búgininen habar beretin sýretter de boldy. Kórmeden belgili fotograftar Qalıǵumar Qabdeshev, Rafat Begıshev, Ardaq Tóleýbaevtyń jumystarymen tanysýǵa bolady.

Al maýsymashar qoıylym retinde kórermen "Abaı" spektaklin tamashalady.