Mekteptegi álimjettik: Túrkistanda taıaq jegen 5-synyp oqýshysy qaıtys boldy

Túrkistanda 5-synyp oqýshysy qaıtys boldy. Synyptasy ony aqsha taýyp bere almaǵany úshin mektep dárethanasynda uryp soqqan. Jaraqat alǵan bala birneshe kún aýyryp, aýrýhanada kóz jumǵan. Bul týraly KTK telearnasy habarlady. 

Qaıtys bolǵan Ramazannyń ájesi Gúlnar Mahanovanyń aıtýynsha, ótken juma kúni  nemeresi sabaqtan taıaq jep kelgen. Denesi aýyryp, demalys kúnderi dáriniń kómegimen áreń júrgen. Dúısenbi kúni aýyryp tursa da, mektepke ketken bala úıge kelisimen taǵy qulaǵan. Ádette eshkimge shaǵymdanbaıtyn Ramazan sol kúni ájesine synyptasynan taıaq jegenin aıtyp bergen.

– Ony dárethananyń ishinde urǵan. Basynan qatty soqqy alǵan. Basyna qan uıyp, keıin tamyry qysylyp qalǵan. Búıregi de isip ketken. Nemeremdi urǵan bala, "men osy synyptyń atamanymyn" dep, jýas balalardy qorqytyp tıyn-teben alady eken. Muny basqa ata-analar da biledi. Bul sonda álimjettik bop tur ǵoı, – dedi qaıtys bolǵan balanyń ájesi Gúlnar Mahanova.

Telearna málimetinshe, Ramazan oqyǵan Túrkistandaǵy №18 mektep-gımnazııasynda álimjettik jıi bolatyny týraly áńgime ata-analar arasynda kóp aıtylady. Alaıda mektep dırektory ony  joqqa shyǵardy.

– Biz ata-analarmen jınalys ótkizdik. Olardyń biri mundaı másele týraly aıtqan joq. Biz balamyzdyń jaǵdaıyna qorqamyz degen másele bolǵan joq. Biraq qaıtys bolǵan oqýshyny taıaq jedi dep aıtylyp jatyr, – dedi J.Edilbaev atyndaǵy mektep-gımnazııanyń dırektory Ýálıhan Besimbaev

Mekteptiń ishi-syrtyna túgel beınebaqylaý kamerasy ornatylǵan. Biraq juma kúni dárethana mańyndaǵy kamera isten shyqqan deıdi dırektor. Tipti taspany keri aınaldyrýdy biletin mektepte maman joq eken. Dese de bul iske qazir polısııa aralasyp jatyr.

– Túrkistan qalasy polısııa basqarmasynyń qyzmetkerleri tekserý júrgizip jatyr. Saraptamalar taǵaıyndaldy. Saraptama qortyndysy boıynsha zań sheńberinde naqty sheshim qabyldanady, – dedi Túrkistan oblysy PD baspasóz hatshysy Saltanat Qarakózova, 

Ramazan qursaqta jatqanda ákesinen aıyrylǵan. Ony týǵan ájesi baýyryna basyp óz ulyndaı ósirgen. Endi on jasar nemeresinen aırylǵan ájesi quzyrly oryndardyń barlyǵyna shaǵym túsirmek. Ol mektep dárethanasynda soqqyǵa jyǵylǵan oqýshyǵa bas-kóz bola almaǵan mektep basshylyǵyn túgel teksersin dep talap etip otyr.