«Túzeý mekemelerindegi qyzmetkerleriniń dinı biliktiligin arttyrý» taqyrybynda semınar ótti

Shymkent qalalyq din isteri basqarmasynyń uıymdastyrýymen «Halyqtar dostyǵy» ýnıversıtetiniń májilis zalynda «Túzeý mekemelerindegi qyzmetkerleriniń dinı biliktiligin arttyrý» taqyrybynda semınar ótti.

Oǵan din isteri basqarmasynyń ókilderi, túzeý mekemesiniń qyzmetkerleri, teologtar, respýblıkalyq jáne jergilikti aqparattyq nasıhat tobynyń músheleri qatysty.

Din isteri basqarmasynyń bólim basshysy Bahyt Tólemisovtiń aıtýynsha, semınardyń basty maqsaty dinı kereǵar aǵymnyń jetegine ilesken jazasyn túzeý mekemesinde ótep jatqan azamattardyń dinı kózqarasyn, ustanymyn ózgertý, zaıyrly qoǵamǵa qaıta oralýyna yqpal jasaý úshin túzeý mekemesindegi qyzmetkerlerdi dinı bilim turǵysynan qarýlandyrý. ICh 167/11 tergeý ızolıatory jedel bóliminiń jedel ýákili ádilet aǵa leıtenanty Hamıt Eskendirovtiń málimdeýinshe, qalada 23 azamat dinı teris aǵymǵa erip, qoǵam qaýipsizdigine qater tóndirgeni úshin oqshaýlaý kameralarynda jazasyn ótep jatyr.

Olardyń barlyǵy da QR Qylmystyq kodeksiniń 174-256 baptary boıynsha ekstremızm, terrorızm is-áreketterine bardy degen kúdikpen sot úkimimen aıypty dep tanylyp, túrmege qamalǵandar. QR Qylmystyq kodeksiniń 174 baby ultaralyq, dinaralyq alaýyzdyqty qozdyrý boıynsha aıyp taǵýdy kózdese, 256 bapta áleýmettik jelilerde dinı teris aǵymdardy nasıhattaǵany úshin jaza taǵaıyndalady.

Semınardy elimizge belgili teolog, Respýblıkalyq aqparattyq nasıhat tobynyń músheleri Dastan Jeleýov pen Nursultan Mamedalıev júrgizip otyrdy. Jıyn sońynda barlyq qatysýshylarǵa arnaıy sertıfıkattar tabystaldy.