Qazaq tili – qoǵamdy biriktiretin til – Baýyrjan Baıbek

«Nur Otan» partııasy tóraǵasynyń birinshi orynbasary Baýyrjan Baıbek Túrkistan oblysynda ótip jatqan «Jastar – Otanga» halyqaralyq forýmynyń alańynda «Meniń elim, meniń tilim» qozǵalysyna qatysty pikir bildirdi.

Baýyrjan Baıbek atap ótkendeı, eldiń tuńǵysh prezıdenti Nursultan Nazarbaev Táýelsizdiktiń 30 jyly ishinde Qazaqstanda qoǵamdyq kelisim men ulttyq birliktiń biregeı modelin qalyptastyrdy. Elbasy baǵytynyń sabaqtastyǵyn saqtaı otyryp, «Nur Otan» qoǵamda, ásirese jastar arasynda ózara qurmet pen barsha azamattyń teńdigi qundylyqtaryn nyǵaıtýdy jalǵastyryp keledi.

«Qazaqstanda «etnıkalyq azshylyq» jáne «dıaspora» degen uǵymdar joq, barlyǵynyń quqyqtary men mindetteri birdeı. Bul – Elbasy saıasatynyń mańyzdy jetistikteriniń biri. El prezıdenti Qasym-Jomart Toqaev osy baǵytty ári qaraı jalǵastyrýda. Kelisim men birlik – memlekettiń turaqty damýy jáne barlyq azamattyń ómirin jaqsartý úshin qajetti bizdiń qoǵamdaǵy basty qundylyqtar. Sondyqtan tildik qysym kórsetildi degen taqyryptaǵy jarııalanymdar jumsartyp aıtqanda, qazaqstandyqtardyń túsinbeýshiligin týǵyzady. Bárimiz – Qazaqstan azamatymyz. Al qazaq tili bizdi biriktiredi. Jaqynda ǵana qoǵam belsendileri iske qosqan «Meniń elim, meniń tilim» qozǵalysy – osynyń naqty dáleli. Oǵan Iаkov Fedorov, Marına Shapovalova, Ásker Pırıev, Marına Saharova, Alekseı Lodochnıkov syndy basqa da kóshbasshy jastar bastamashy boldy. Bul qozǵalys búkil qoǵamǵa jastardyń zerdeliligi men olardyń Otanymyzdyń bolashaǵy úshin jaýapkershiliginiń zor ekenin kórsetti dep oılaımyn. «Nur Otan» Qazaqstan halqy Assambleıasymen birlesip, azamattyq biregeılikke, baı tarıhı tamyrdy, ulttyq mádenıet pen rýhanı dástúrlerdi saqtaý men damytýǵa negizdelgen qazaqstandyq patrıotızmdi odan ári damyta beredi», – dep atap ótti ol.

Bıleýshi partııa tóraǵasynyń birinshi orynbasary búginde árbir úshinshi qazaqstandyqtyń 30 jastan aspaǵanyn, sondyqtan jastardy jan-jaqty qoldaý «Nur Otan»-nyń jáne «Jas Otan» jastar qanatynyń basty baǵyttarynyń biri ekendigin atap ótti.

«Búginde jasotandyqtar májilis pen máslıhat saılaýynyń qorytyndysy boıynsha «Nur Otan»-nyń 616 jas depýtatynan turatyn korpýs jasaqtap úlgerdi. Bul Elbasynyń bastamasymen qolǵa alynǵan bıleýshi partııanyń saılaýaldy tizimindegi 20%-tik jastar kvotasynyń arqasynda múmkin bolyp otyr. El prezıdenti Q.Q.Toqaev óziniń saıası reformalarynda jastar kvotasyn barlyq partııalardyń saılaýaly tizimderi úshin mindetti etip bekitti. Jastardy júıeli qoldaý maqsatynda keń kólemde júrgizilgen kópshilik talqylaýdan keıin jasotandyqtar 2025 jylǵa deıingi «Jastar-Otanǵa!» baǵdarlamasyn qabyldady. Ol búginde partııamyzdyń erekshe baqylaýynda», – dep atap ótti Baýyrjan Baıbek.