Nobel syılyǵyn jýrnalıster aldy. Syılyq olarǵa qandaı eńbegi úshin berildi?

Fılıppındik jýrnalıst Marııa Ressa men reseılik jýrnalıst Dmıtrıı Mýratovke Nobel syılyǵy berildi. Nobel komıtetiniń aqparatynsha, olar bul syılyqqa Fılıppın men Reseıde sóz bostandyǵyn qorǵaý jolynda batyl kúreskeni úshin laıyq dep tanylǵan.

Komıtet olardy "sóz erkindigin jaqtaıtyn barlyq jýrnalısterdiń ókili" dep atady.

Syıaqy retinde 10 mıllıon shved krony (1,1 mıllıon dollar) beriletin bedeldi syılyqtyń jeńimpazdary Oslodaǵy Norvegııa Nobel ınstıtýtynda jarııalandy. 

"Rappler" aqparat saıtynyń negizin qalaýshy Ressa hanymǵa Nobel syılyǵy óz otany Fılıppınde "bılikti asyra paıdalanýdy, zorlyq-zombylyq pen kúsheıip kele jatqan avtorıtarızmdi áshkerelegeni úshin berilgen.

Al "Novaıa gazeta" táýelsiz gazetin qurǵan jáne oǵan 24 jyl bas redaktor bolǵan Dmıtrıı Mýratov ondaǵan jyldar boıy Reseıde sóz bostandyǵyn qorǵap kelgeni úshin syılyqqa laıyq dep tanylǵan. Jyl saıyn Reseıde sóz erkindigi barǵan saıyn qıyn jaǵdaıǵa túsip keledi.

Mýratov ózi marapat týraly áli ashyq túrde eshnárse aıtpady, biraq ony Kreml quttyqtady.

Kreml ókili Dmıtrıı Peskov jýrnalıst jaıly "Ol óziniń ustanymdaryna sáıkes tabandylyqpen jumys isteıdi, ustanymyna berilgen, talantty, batyl"  dedi.

Nobel komıteti jýrnalıstıka erkin, táýelsiz jáne faktilerdi negiz etýi kerek ekenin aıtyp, "táýelsiz jýrnalıstıka bılikti asyra paıdalanýdan, ótirikten jáne soǵys nasıhatynan qorǵaýǵa qyzmet etedi" dep habarlady.

"Sóz bostandyǵy men baspasóz bostandyǵy bolmasa, bizdiń zamanymyzda  memleketter arasyndaǵy dostyqty, qarýsyzdanýdy jáne jaqsy álemdik tártipti tabysty damytý qıyn bolady" delingen komıtet málimdemesinde.