• USD 424.85

  • EUR 504.21

  • RUB 5.84

  • CNY 65.86

29 Qarasha, 11:06:19
Almaty
+2°

Almatydaǵy "Alataý" respýblıkalyq balalar klınıkalyq shıpajaıynyń pedagog mamandary birneshe jyldan beri jalaqylarynyń kóterilmeı kele jatqanyn aıtyp, prezıdent Q.Toqaevtan kómek suraıdy. Sózderinshe, olar bilim jáne medısına salasy qyzmetkerleriniń jalaqysyn joǵarylatý týraly úkimet qaýlylaryna ilinbeı keledi. Medısına salasynda ustazdyq etetin mamandar salalyq mınıstrlikterge joldaǵan talap-tilek, aryz-shaǵym esh nátıje berer emes dep otyr.

Shıpajaı pedagogteri eldiń túpkir-túpkirinen kelgen 3 pen 14 jas aralyǵyndaǵy balalarǵa emdik sharalar kórsetýmen aınalysady. Sanatorıı 100 orynǵa shaqtalǵan. Emdeý kýrsy 21 kúnnen turady. Sanatorııge negizinen bronh demikpesine shaldyqqan balalar túsedi. 2020 jyly 1813 bala saýyqtyrý sharalarynan ótken. Onyń 89 paıyzy mektep jasyndaǵy balalar. Mektep jasyna deıingi balalar sanatorııde bas-kóz bolatyn adammen qalsa, mektep jasyndaǵy balalar shıpajaıda medısınalyq personal men oqý-tárbıe bóliminiń qaraýynda bolady.

Oqý-tárbıe bólimi sanatorııdegi balalardyń emosıonaldyq jáne psıhologııalyq tonýsyn joǵarylatýmen shuǵyldanady. Sondyqtan balalar mekemesindegi pedagogıkalyq qyzmettiń emdik áseri qatar júredi. Bul – emdeý kesheniniń mindetti bóligi sanalady.

 

– Balalardy sátti emdeý durys jolǵa qoıylǵan pedagogıkalyq jumystyń arqasynda ǵana múmkin bolyp otyrǵanyn basa aıta ketken jón. Pedagogter balalardy emdeýde dárigerdiń mańyzdy kómekshisi. Dáriger men pedagog bir maqsatqa jumys isteıdi. Olar sanatorııde balanyń organızmi nyǵaıyp, syrqatqa qarsy turarlyqtaı kúsh jınaýyna, sondaı-aq jas mólsherine saı, aqyl-oıynyń damýyn qamtamasyz etýge yńǵaıly bolatyndaı meılinshe qajetti jaǵdaı jasaýǵa tıis. Shıpajaıda bolǵan ýaqytta balalar mektep baǵdarlamasynan qalyp qoımaýy kerek. Sondyqtan bul jaqta emmen qatar sabaq ta júredi. Sabaq qazaq tili, ádebıet, matematıka, orys tili men ádebıeti sııaqty negizgi pánder boıynsha ótedi. Sabaqty joǵary bilimdi pedagog júrgizip, em sharalary aıaqtalǵan soń arnaıy tabel beriledi, – deıdi mekeme mamandary.

 

Osylaısha, pedagogıkalyq qyzmetpen aınalysatyn mamandar birneshe jyldan beri eńbekaqyny joǵarylatý isinde múlde nazarǵa alynbaı, esh baǵdarlamaǵa ilinbeı, orta jolda qalyp qoıǵanyn aıtady.

Úkimettiń "Azamattyq qyzmetshilerge, memlekettik bıýdjet qarajaty esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesi týraly" 2015 jylǵy 31 jeltoqsandaǵy № 1193 qaýlysyna ózgerister men tolyqtyrýlar engizý týraly 2020 jylǵy 28 qańtardaǵy № 11 qaýlysyna saı, qujatta atalǵan salalardaǵy mamandardyń bazalyq laýazymdyq jalasy 2020 jylǵy 1 qańtardan bastap 1,25 esege, 2021 jylǵy 1 qańtardan bastap 1,5 esege ósken. Alaıda sanatorı pedagogteriniń jalaqysy sol kúıi qalǵan. Ony sanatorıı densaýlyq saqtaý mınıstrligi tarapynan qarjylandyrylmaıtynymen túsindirgen.

Budan bólek "Pedagog mártebesi týraly" zań aıasynda pedagogterdiń jalaqysy 2020 jyly 25 paıyzǵa, 2021 jylǵy 1 qańtardan bastap taǵy 25 paıyzǵa kóterilgende de sanatorıı ustazdary tys qalǵan. Mekeme esepshisi pedagogter densaýlyq saqtaý salasynda isteıtindikten, bala oqytýǵa lısenzııa berilmegendikten bul zańǵa enbeı qalǵanyn aıtqan.

Eki birdeı zań aıasynan tysqary qalyp qoıǵan mekeme qyzmetkerleri 2020 jylǵy 1 qańtardan bastap dáriger mártebesin kóterý úshin dárigerler jalaqysyn 30 paıyzǵa, ortasha medısına personaly jalaqysyn 20 paıyzǵa kóterý týraly memleket basshysynyń tapsyrmasyna da telmirip qaraǵan. Biraq bul joly da pedagogter nazarǵa ilinbegen.

Pedagogter sondaı-aq Qazaqstan Respýblıkasy Úkimetiniń 2020 jylǵy 28 qańtardaǵy №11 Qaýlysynda jazylǵan "Pedagogterge týberkýlez (týberkýlezge qarsy) mekemelerinde, dıspanserlerinde, sanatorıılerinde, sanatorıı-profılaktorıılerinde, ortalyq aýdandyq aýrýhanalar bólimshelerinde jáne basqa da densaýlyq saqtaý uıymdary men sanatorıı úlgisindegi mektep ınternattarda, mektepke deıingi bilim berý uıymdarynda jumys istegeni úshin bazalyq laýazymdyq jalaqynyń 60 paıyz mólsherinde joǵarylatý" týraly pýnkt nelikten oryndalmaǵanyn túsine almaı dal.

"Alataý" respýblıkalyq balalar klınıkalyq shıpajaıynyń pedagog mamandary atalǵan másele boıynsha densaýlyq saqtaý mınıstri Alekseı Soıǵa hat joldap, tıisti zańǵa ózgeris engizý máselesi qaralatyny týraly jaýap alǵan.

Sharýanyń mundaı shaban júrisine kelispeıtin pedagogterdiń bar úmiti endi prezıdentte. О́ıtkeni olar tómengi jalaqy kadr jetispeýshiligine ákelip soǵyp, jumystyń sapasyna, qyzmettiń básekege qabilettigine qatty áser etip otyrǵanyn aıtady. Budan bólek "pandemııa, ekonomıkalyq daǵdarys, kezinde eńbektiń laıyqty baǵalanbaýy jumys belsendiligi men jumysqa degen qyzyǵýshylyqtyń joǵalýyna soqtyryp otyr" deıdi mamandar.
"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir