Pavlodarda RBK bank fılıalynyń basshysy óli tabyldy

Pavlodarda RBK bank fılıalynyń dırektory 8-qabattan sekirip, kóz jumdy. Bul týraly Pavlodarnews.kz saıty habarlady.

Oblystyq polısııa departamenti baspasóz qyzmetiniń málimdeýinshe, áıel 5 qazan kúni tańerteń óli kúıinde tabylǵan.

"Pavlodarda Bekturov kóshesi, 50/1 úıde 8-shi qabattyń balkonynan sekirip, óz-ózine qol jumsaǵan 1972 jyly týǵan azamattyń denesi tabyldy" delingen vedomstvo taratqan habarlamada. 

Atalǵan fakt boıynsha qylmystyq kodekstiń 105-babyna (ózin-ózi óltirýge deıin jetkizý) sáıkes sotqa deıingi tergeý bastalǵan. Saraptama taǵaıyndalǵan.

Qaıtys bolǵan 49 jastaǵy áıeldiń Pavlodardaǵy "Bank RBK" fılıalyn basqarǵany týraly aqparatty bank resmı túrde rastady.

"Bank RBK" AQ Pavlodar qalasy fılıaly basshysynyń mezgilsiz ómirden ótkenin habarlaıdy. Bank basshylyǵy men ujymy áriptesimizdiń týystary men jaqyndaryna qaıǵyryp kóńil aıtady. Bank tarapynan áriptesimizdiń otbasyna materıaldyq kómek kórsetiletin bolady. Jáne istiń mán-jaıyn tergeýge qoldaý kórsetedi. Tergeý aıaqtalǵanǵa deıin bank dálelsiz aqparat taratpaýǵa shaqyrady", delingen habarlamada.