Kúsh qoldanýǵa májbúr boldym - sot oryndaýshysyn urǵan adam

Almatydaǵy sot oryndaýshysyn soqqyǵa jyqqan Maqsot Ysqaqov esimdi azamat mundaı áreketke amalsyzdan barǵanyn aıtady. 

Maqsut Ysqaqovtyń sózinshe, ol bir apta buryn úıi bar saıajaı ýchaskesin satyp alǵan. Múlikti satyp alý barysynda úıge qatysty eshqandaı qıyndyq bolmaıtynyna kóz jetkizgen. Kottedjdi satyp alǵanda sot sheshimi týraly bilmegen. 

– 4 qazan kúni, ózin sot oryndaýshysymen dep tanystyrǵan Ádil Ermekov jáne bir jas jigit keldi. Olar maǵan oryndaý paraǵyn kórsetti. Men qujatty qarap, boryshker retinde men emes, múldem basqa tulǵanyń aty-jóni kórsetilgenin aıttym. Men úıdi zańdy túrde satyp aldym. Qujattyń bári bar. Maǵan jáne meniń múligime qatysty sot sheshimi bolǵan joq ekenin aıttym. Biraq olar meni tyńdaǵylary kelmedi, –  dedi Maqsot Ysqaqov.

Maqsot birden oqıǵa ornyna polısııa qyzmetkerlerin shaqyrǵanyn, aldymen oqıǵa ornyna patrýlder, sodan keıin ýchaskelik polısııa qyzmetkeri kelgenin aıtty.

– Men olarǵa sot sheshimi joq ekenin aıttym. Sol kezde sot oryndaýshysy men onyń kómekshileri meniń úıimniń aýmaǵyna kirip ketti. Olar meniń qorshaýym men shatyrymdy buzýǵa tyrysty. Men polısııa qyzmetkerlerinen meniń aýmaǵymnan bóten adamdardy shyǵarýdy ótindim. Olardyń jumysyna kedergi jasaýǵa tyrystym, biraq olar meni ıterip, qoldarymdy buraı bastady. Mende buǵan dálel bar, men medısınalyq tekserýden óttim, – dedi ol. 

Ysqaqov sot oryndaýshysy tarapynan dórekilik kórsetilgennen keıin kúsh qoldanýǵa májbúr boldym deıdi. 

– Meni "úsh áripke" jibergende, ózimdi ustaı almaı qaldym. Sonymen qatar, sharasyz boldym. Polısııa qyzmetkerleri maǵan kómektesýge tyryspady. Maǵan qarsy 10 adam boldy, sodan keıin meniń ókilderim keldi. Men kezekshi prokýrordy shaqyrdym, biraq  ol kelýden bas tartty. Sodan keıin oqıǵa ornyna AIIB basshysynyń orynbasary keldi, – dedi Maqsot. 

Úı ıesi boksshy Janqosh Turarovtyń qaqtyǵysqa qatysýy týraly da túsinik berdi. Onyń aıtýynsha, Turarov osy úıdiń burynǵy ıesiniń týysy bolǵan. Osy kezde onyń tátesi úıde bolǵan. Alaıda boksshy  kúsh qoldanbaǵan jáne qaqtyǵysqa belsendi qatyspaǵan. 

Ysqaqov óz kezeginde polısııaǵa jeke sot oryndaýshysy men onyń kómekshileriniń áreketterine aryz jazǵan. Ol ózin kináli dep sanamaıdy.