Prezıdenttik olımpıada bastalady

Qyrkúıektiń 30 kúni mańǵystaýlyq oqýshylardyń arasynda úzdikterdi anyqtaıtyn Prezıdenttik olımpıada bastalady.

Olımpıada «Ustudy» testileý ortalyǵynda «Bir qatysýshy - bir kompıýter - bir kamera» qaǵıdasy boıynsha uıymdastyrylmaq.

 Dúbirli dodanyń I týry respýblıka boıynsha bir ýaqytta ótedi. Prezıdenttik olımpıadada 11 synyp oqýshylary jaratylystaný-matematıka baǵytyndaǵy matematıka, hımııa, bıologııa jáne fızıka páni boıynsha tapsyrmalar oryndaıdy. О́lkemizden bul kezeńge 50 oqýshy qatysady.

-Prezıdenttik olımpıada Elbasy Nursultan Nazarbaevtyń tapsyrmasy boıynsha 2008 jyldan beri ótkizilip keledi. Dástúrli túrde ótetin olımpıadanyń oblystyq kezeńi aǵymdaǵy jyldyń 30 qyrkúıegine josparlanǵan. Olımpıadaǵa 11-synyp oqýshylary qatysady. Olımpıadanyń talaptary boıynsha bir oqýshy matematıka, hımııa, bıologııa jáne fızıka páninen tapsyrady jáne qatysýshy oqýshy buryn respýblıkalyq pen halyqaralyq olımpıadaǵa qatyspaǵan bolýy shart. Prezıdenttik olımpıadanyń basty ıdeıasy - jaratylystaný-matematıkalyq baǵyttaǵy pánderdi oqytýda oqýshylardyń qyzyǵýshylyǵyn arttyrý, teorııalyq bilimderi men daǵdylaryn tereńdetý. Qatysýshylardyń ishinde joǵary upaı jınaǵan 20 oqýshy ekinshi kezeńge joldama alady. Ekinshi kezeńnen súrinbeı ótken oqýshy respýblıkalyq kezeńge qatysady. QR «Bilim týraly» zańyna sáıkes Qazaqstan Respýblıkasy Bilim jáne ǵylym mınıstrliginiń I, II jáne III dárejeli dıplomdarymen marapattalǵan Prezıdenttik olımpıadanyń jeńimpazdary men júldegerleri elimizdiń joǵary oqý oryndarynda oqý úshin bilim berý granttaryn alý konkýrsyna qatysý kezinde basym quqyqqa ıe bolady, deıdi Mańǵystaý oblystyq «Daryn» qosymsha bilim ortalyǵynyń zııatkerlikti damytý jumystary zerthanasynyń basshysy Gaýhar Tadjıbenova.

Prezıdenttik olımpıadanyń II kezeńi aǵymdaǵy jyldyń 22 qazanynda ótedi. Osy aralyqta I kezeńniń jeńimpazdaryn halyqaralyq trenerler arqyly olımpıadaǵa daıyndaý josparǵa qoıylǵan. Oblystyq kezeńniń jeńimpazdary 15-18 qarashada ótetin Prezıdenttik olımpıadanyń respýblıkalyq kezeńine qatysady.

2019-2020 oqý jylynda ótken Prezıdenttik olımpıadanyń jeńimpazdary qazirgi tańda joǵary oqý oryndarynda bilim granttarymen bilim alýda.