22 Qyrkúıek, 2021 NEWS О́zgertý

Mýsınniń daýy. Reseı ózi qoldanbaǵan platformany Qazaqstanda synamaq–IT maman

Foto: Ashyq derekkóz

Qazaqstandyq "RESELF" IT kompanııasynyń dırektory Janserik Tólegen jáne "QMED" Ulttyq ınnovasııalyq medısına palatasynyń basshysy Ákim Tursyn Reseı ózi qoldanbaǵan platformany Qazaqstanda synamaq ekenin jetkizdi. Bul týraly olar jýrnalıst Nartaı Aralbaıdyń Youtube arnasyna bergen suhbatynda aıtty.

Janserik Tólegen men Ákim Tursyn jarty mıllıard dollar jumsalatyn jobanyń kóńil kónshiterlikteı emes ekenin aıtty.

Jýrnalıst Nartaı Aralbaı "Egov-ty Sber-ge aýystyrý qoǵamda qatty talqylanyp jatyr. Oǵan Qazaqstannyń bıýdjetinen jumsalatyn 500 mıllıon $ aqylǵa tompaq dúnıe. Sonsha qarjy jumsap Reseıdiń platformasyn engizetindeı basymyzǵa ne kún týdy? Munyń astarynda qandaı qaýip bar? Qazaqstan IT maman joq pa? Zańdy suraqtar. Bir ǵana masqarany aıtaıyq, Sber-di Reseıdiń ózi áli qoldanbaǵan. Demek, Qazaqstan olar úshin synaq alańy sekildi. Test retinde kóredi, bizdiń elde kemshilik ketse óz elderine engizbes buryn sony jóndep alady. Al biz olardyń shıki platformasyna búkil halqymyzdyń jeke málimetin júktemekpiz. Ol úshin bıýdjetimizden 500 mıllıon $ tólenbek" dep jazdy óziniń Youtube arnasynda.

Jýrnalıstiń "Rasymen Baǵdat Mýsın bizdiń jeke málimetterimizdi orystardyń qolyna berip jatyr ma?" degen saýalyna Janserik málimetterdiń olarǵa berilmeıtinin aıtty, alaıda "Baǵdat Mýsınniń sózi boıynsha, biz tek ǵana tehnologııasyn alamyz. Árıne ol tehnologııany alyp kelip, ony bizdiń mamandar qysqa ýaqytta alyp kete ala ma, almaı ma? ol bólek áńgime. Eger reseılik mamandar kelip bizdiń aqparattarmen jumys istese, aıyrmashylyq joq sııaqty" dedi.

Maman platformanyń dokýmentasııasyn qarap, zerttegenin aıtyp, "Sondaı 150 mln dollar jumsaımyz dep otyrǵan úlken platformanyń bar joǵy 210 bettik dokýmentasııasy bar. Ol óte az. Odan keıin ol birinshi versııasy. Oǵan qosa, ol ózderinde jasalmaǵan. Al, biz sony alaıyq dep otyrmyz" deıdi.

Janserik platformanyń qanshalyqty tıimdi ekenin bilý úshin demo versııasyn synap kórmek bolǵanyn aıtty.

–Maǵan dostýp bermeı qoıdy. Al, ásheıin dostýp ala almaıtyn júıeni jasaıtyn platformada, ıaǵnı ondaı jabyq turǵan dúnıede komıýnıtı bolmaıdy. Komıýnıtı degen qoldanatyn adamdar az bolady degen sóz. Al qoldanatyn adamdar qanshalyqty az bolsa, sonshalyqty shıki bolady. Biz ony Reseıden birinshi bolyp paıdalanaıyq dep jatyrmyz,–dedi IT maman.

Jýrnalıstiń "Reseı ony paıdalanyp jatqan joq pa?" degen saýalyna "Joq. Reseı ony ózderine engize almady. Qarapaıym tilmen aıtqanda bylaı: biz 150 mln dollar aqsha beremiz, sol úshin biz olardyń júıesin synap beremiz. Bizge qıyn bolǵany, tegin ashyq derekkóz sheshimderden obertka jasap, bizge berip jatyr. Kak býdto bizdi aldap jatqan sııaqty" dep jaýap berdi Janserik Tólegen.

Aıta keteıik, buǵan deıin Chehııa memleketinde de Qazaqstandaǵy sııaqty daý týdyrǵan IT joba týraly habarlaǵan bolatynbyz. Chehııanyń burynǵy transport mınıstriniń mıllıondaǵan eýroǵa baǵalaǵan IT jobasynyń óte qymbat ekenin aıtyp, qarsy shyqqqan 60 programmıstiń jobany tegin istegeni, mınıstrdiń otstavkaǵa ketkeni týraly habarlanǵan.

"Qamshy" silteıdi