"Analaryń qaıtys boldy". Aýrýhanaǵa emdelýge barǵan zeınetker ajal qushty (vıdeo)

Almaty qalasyndaǵy "Mama ı malysh" medısınalyq ortalyǵynda 20 kúnnen beri em alyp júrgen Kúlzapııa Alteeva esimdi 63 jastaǵy zeınetker dárigerler qolynan qaıtys boldy. Bul jaǵdaıdan keıin marqumnyń týystary "Qamshy" redaksııasyna habarlasyp, jumbaq ólimge kinálilerdiń tıisti jaza alýlaryn talap etýde.

Marqum Ońtústik Qazaqstan oblysy Túlkibas aýdanynan arnaıy em alý úshin Almatyǵa kelgen. Jekemenshik aýrýhanada emdelip júrgenine 20 kúndeı bolypty. Qyrkúıektiń 20-sy kúni ádettegideı óz aıaǵymen em qabyldaýǵa barǵan pasıent klınıkada kóz jumǵan. 

– Qaıtys bolǵan kisi meniń qudaǵıym bolyp keledi. Osydan biraz ýaqyt buryn balalaryna densaýlyǵy syr berip, aýyryp júrgenin aıtqan. Keıin uly men kelini anasyn Almatydaǵy "Mama ı Malysh" degen jekemenshik emhanalardyń birine ornalastyrǵan, – dedi Rahııa Áýezhanqyzy. 

Rahııanyń aıtýynsha marqum kúndelikti sıstemalaryn alyp emhanaǵa ózi qatynap júrgendikten jaǵdaıy da birqalypty bolǵan.

– Jekemenshik emhananyń bir qyzmetkeri qudaǵıymnyń denesin kóliktiń artyna jatqyzyp, ústine aq shúberek jaýyp: "analaryń qaıtys boldy" dep alyp kelgen. Tipti balalaryna anasynyń qaıtys bolǵanyn habarlap aıtpaǵan. Tek jeńil kólikpen úıiniń aldyna súıegin kóterip, jetip kelgen. Balalary kóliktiń artyndaǵy máıitti kórip, shoshyp ketti. Beti-aýzy kógerip, qyzaryp ketken. Sumdyq emes pe?! Jumbaq ólimniń artynda bir shıkiliktiń bary anyq. Oılap qarasańyz kez-kelgen medısınalyq mekemede adam qaıtys bolǵannan keıin áýeli jaqyndaryn shaqyrtyp, estirtedi, – dedi ol.

Kúlzapııa Alteevanyń týystary marqumnyń qandaı dıagnozben qaıtys bolǵanyn áli kúnge deıin túsine almaı otyr. Dárigerlerdiń aıtýynsha, Altaeevanyń jaǵdaıy aldynda "nasharlap júrgen edi" dep túsindirgen. Alaıda marqumnyń týystary muny joqqa shyǵaryp, senbeıtinin aıtty.

– Máıitti alyp kelgennen keıin biz ony úıge kirgizbedik. О́ıtkeni istiń qalaı oryn alǵanyn túsinbegendikten tıispedik. Sodan marqumnyń jaqyndary birden polısııa shaqyryp, isti tirketken. О́ıtkeni, qaıtys bolǵan kisiniń denesinde kógergen izder bar. Biz endi ǵana marqumdy jer qoınyna tapsyrǵandyqtan, bul iske áli tolyqtaı kirispedik, – dedi marqumnyń qudaǵıy Rahııa Áýezhanqyzy.

"Qamshy" redaksııasy "Mama ı malysh" medısınalyq ortalyǵyna habarlasyp, atalǵan is boıynsha túsinikteme almaq boldy. Alaıda ortalyq telefon tutqasyn kótermedi.