Almatyda atystan qaıtys bolǵan polıseılerdiń otbasyna úı beriledi

Ishki ister mınıstri Erlan Turǵymbaevtyń tapsyrmasy boıynsha, mınıstrdiń orynbasary Murat Baımuqashev qaza tapqan polısııa qyzmetkerleri Darhan Súleev pen Nurbol Baıǵazıevtiń otbasylaryna bardy. Bul týraly Almaty qalalyq polısııa departamenti bastyǵynyń tergeý boıynsha orynbasary Rústam Abdrahmanov instagram paraqshasynda jarııalady. 

Murat Baımuqashev ishki ister mınıstriniń atynan, qyzmettik mindetterin atqarý kezinde qaza tapqan polıseılerdiń týystary men jaqyndaryna kóńil aıtty. 

"Ishki ister mınıstriniń ótinishi boıynsha Almaty qalasynyń ákimdigi qaza tapqan polısııa qyzmetkerleriniń otbasylaryna turǵyn úı beredi. Sonymen qatar, zań kúzetinde turǵan ýchaskelik ınspektorlar qaıtys bolǵannan keıin "quqyq tártibin qamtamasyz etýge qosqan úlesi úshin" medaldarymen marapattaldy" delingen habarlamada.