Nazym Qyzaıbaı men Angelına Lýkas bokstan shettetilýi múmkin

Bokstan Qazaqstan áıelder quramasynyń múshesi Nazym Qyzaıbaı men Angelına Lýkas quramadan ýaqytsha shettelýi múmkin. Bul týraly Sport jáne dene shynyqtyrý isteri komıtetiniń baspasóz qyzmeti habarlady.

Boksshy Angelına Lýkastyń áıelder arasyndaǵy ulttyq quramadaǵy jaǵdaılarǵa baılanysty joldaǵan úndeýi boıynsha qyzmettik tekseris júrgizý úshin arnaıy komıssııa qurylǵan.

Komıssııaǵa taraptardyń ýáji men istiń matarıaldaryn qarap, tómendegideı sharalar qabyldaý mindeti qoıylyp otyr:

• Qazaqstan boks federasııasy Ulttyq Olımpıada komıtetimen birlesip, sport etıkasyn buzǵany úshin eki boksshy – Nazym Qyzaıbaı men Angelına Lýkasty ýaqytsha shettetý máselesin qarastyrý;
•  Sporttyq tártipti buzý faktileri boıynsha obektıvti tergeý júrgizip, 20 qyrkúıekke deıin Sport jáne dene shynyqtyrý isteri komıtetine ulttyq komandanyń básekege qabiletti quramyn jasaqtaý;
• Áıelder quramasy bas bapkeriniń raporty boıynsha, dopıngke qarsy ulttyq ortalyqtyń mamandaryn tarta otyryp, qurama komanda músheleriniń dopıng (tyıym salynǵan preparattar) qoldaný múmkindigine tekserý júrgizý;
• Komandadaǵy psıhologııalyq ahýaldy jaqsartý, janjalǵa jol bermeý úshin psıhologtardy, medıatorlardy tarta otyryp jumys júrgizýdi usyný.

"Mádenıet jáne sport mınıstrligi aldaǵy ýaqytta osyndaı keleńsiz jaǵdaıǵa jol bermeý úshin federasııalardyń bárine komandadaǵy tárbıelik jumysty kúsheıtý qajettigi týraly hat joldady. Sondaı-aq bas bapker Erik Alǵabektiń ulttyq quramadaǵy baqylaýdy álsiretkenin atap ótý kerek. Bul komandadaǵy sporttyq tártipti júıeli túrde buzýǵa alyp keldi" dep málimdeme jasady komıtettiń baspasóz qyzmeti.

Arnaıy komıssııa quramadaǵy barlyq boksshy qyzdarǵa qyzmettik tekseris júrgizedi. Komıssııa endi sporttyq tártiptiń qalaı buzylǵanyn, dopıng qoldanǵan sportshylardyń bar-joǵyn anyqtaıdy. Sondaı-aq, eńbek shartyn buzǵany úshin Angelına Lýkasty qandaı tártiptik jaýapkershilikke tartatynyn da sheshedi.

Aıta keteıik, buǵan deıin Angelına Lýkas "maǵan Nazym Qyzaıbaı kún kórsetpeıdi, sonyń kesirinen Ulttyq quramadan shettetildim" dep jarııalaǵan edi.