Shymkentte «Saıram kómekshi mektep-ınternat kolledji» arnaıy kesheninde qurylys jumystary aıaqtaldy

Shymkent qalasynyń bilim basqarmasyna qarasty Saıram kómekshi mektep-ınternaty budan bylaı «Saıram kómekshi mektep-ınternat-kolledji arnaıy kesheni» kommýnaldyq memlekettik mekemesi bolyp qaıta quryldy.

Burynǵy mektep-ınternattyń ornyna tıptik úlgidegi jańa ǵımarat salynýda. Búginde ǵımarat qurylysy 95 paıyzǵa aıaqtalyp otyr. Oqý kesheninde 210 bala tárbıe men bilim alatyn bolady. Jobaǵa sáıkes oqý kesheni jataqhanamen, oqý ǵımaratymen, akt jáne sport zaldarymen, medısınalyq pýnktpen, ashanamen qamtylǵan. Keshenniń 35 synyptyq bólmeleri oqý zamanaýı jabdyqtarymen qamtamasyz etiledi.

Zamanaýı úlgide boı kótergen keshende tiginshilik, aspazdyq kásipti úıretýge arnalǵan sheberhana bólmeleri, arnaıy kútim qajet etetin balalarǵa arnalǵan korreksııalyq oqý, sensorlyq bilim alý, psıholog, logoped mamandardyń synyp bólmeleri arnaıy jabdyqtalyp, jazǵy sport alańy qarastyrylǵan.

Mekeme oqýshylaryna arnalǵan sabaqtar qazaq tilinde júrgiziledi. Oqýshylarǵa kásiptik mamandyqtar boıynsha dıplom beriledi. Qosymsha bilim berýde qolóner úıirmeleri jumys isteıtin bolady.

Aıta keteıik, mektep-ınternattyń ǵımaraty 1916 jyly salynǵan. 1935 jyly qosymsha bólmeler qosylyp, balalar úıi bolǵan. 1975 jyly «Saıram kómekshi mektep-ınternaty» bolyp ózgertildi. Mekemeniń fýnksıonaldyq mindetterine arnaıy oqytýdy qajet etetin balalardyń psıhofızıkalyq kemshilikterin túzetý, olardyń fýnksıonaldyq saýattylyǵyn arttyrý, eńbekke baýlý jáne qoǵamdyq ómirge beıimdeý kiredi.