Murat Áıtenovtiń kezekti tikeleı efıri jol qurylysy salasyna arnaldy

Shymkent qalasynyń ákimi Murat Áıtenovtiń kezekti tikeleı efıri jol qurylysy salasyna arnaldy. Ádettegideı tártippen efır qaladaǵy epıdemıologııalyq jaǵdaıdy baıandaýdan bastaldy. Sońǵy táýliktegi jaǵdaı boıynsha COVID-19 ınfeksııasy qalanyń 160 turǵynynan anyqtalyp, dert juqtyrǵandar statıstıkasy 37 822 adamǵa jetken. Jaǵdaı birshama turaqtalǵanymen, turǵyndarǵa vaksına salý jumystary báseńdegen joq.

Tikeleı jeliniń negizgi taqyrybyna kóshken qala ákimi Memleket basshysy Qazaqstan halqyna arnaǵan bıylǵy Joldaýynda elimizdiń ishki baılanysyn jaqsartýda kólik ınfraqurylymna qatysty naqty tapsyrmalar júktegenin atap ótti.

Avtomobıl joldary qala ekonomıkasynyń mańyzdy sektory ekenin nazarǵa alǵan Murat Dúısenbekuly, jol sapasyn arttyrýda naqty kórsetkishter belgilenip, iske asyp otyrǵandyǵyn jetkizdi.
Búgingi tańda Shymkent qalasyndaǵy joldardyń jalpy uzyndyǵy 3247 shaqyrymdy quraıdy. Bıyl jaqsy jáne qanaǵattanarlyq jaǵdaıdaǵy joldardyń úlesin 63,6 paıyzǵa jetkizý josparlanǵan.

Respýblıkalyq qala mártebesin alǵan 2018 jyly bul kórsetkish 53 paıyzdy quraǵan. Qala ákimi osy jyldar ishinde kólik joldarynyń sapasyn arttyrýǵa aıryqsha mán berilip, salaǵa bólingen qarajat pen jumys kólemi eselep artqanyn málimdedi. Sońǵy úsh jylda qala boıynsha 850 shaqyrymnan astam jol tóselgenin aıtty.

Atap aıtqanda, 2018 jyly 4,1 mlrd teńge qaralyp, 222,6 shaqyrym bolatyn 112 nysanda jol qurylysy, jóndeý jumystary júrgizilse, 2020 jyly 416,8 shaqyrym bolatyn 261 jol nysany qamtylyp, 21,9 mlrd. teńge qarjy bólingen. Bıylǵy jyly 311,3 shaqyrym bolatyn 182 jol nysandarynda qurylys-jóndeý jumystaryn júrgizýge 34,8 mlrd. teńge qaraldy. Onyń ishinde aýqymdy jobalar – A-2 aınalma jolynyń kezeńdik jumystary, Qonaev dańǵyly jalǵasynyń qurylysy, Qonaev-Rysqulov kóshesinde jolaıryq qurylystary qamtylǵan.

Bıylǵy jospar boıynsha qala aýdandarynda 71 kóshe kúrdeli jóndeýden ótkizilip otyrsa, ortasha jóndeýmen 9 magıstraldy jáne 151 ishki oramdyq kósheler qamtylǵan. Jyl sońyna deıin 270 shaqyrymnan astatyn 169 nysan paıdalanýǵa berilmek. Shaǵal tas tóseý jumystary 157 shaqyrymdyq 277 kóshede josparlanyp, atqarylýda. Jer asty ınfraqurylym jelileri tartylǵan aýmaqtardyń joldaryna tas tóseý úshin qosymsha 500 mln. teńge qarastyrylǵan.

Qala basshysy efır barysynda A-2 aınalma jolynyń qurylys barysy, jolaıryq qurylystary, Qonaev dańǵylynyń jalǵasy jobalary boıynsha atqarylyp jatqan jumystar boıynsha maǵlumat berip, jol qozǵalysynyń qaýipsizdigin qamtamasyz etý baǵytyndaǵy bastamalar jóninde keńinen toqtaldy.

Tikeleı efırde shahar basshysy turǵyndardyń saýaldaryna jaýap berip, jol salasyndaǵy árbir nysanǵa jeke-dara toqtaldy.