Bıyl Shymkent turǵyndary sapaly aýyz sýmen qamtylady

Shymkent ákiminiń turǵyndarǵa qolaıly jaǵdaı jasaý jónindegi tapsyrmasyna sáıkes, shalǵaı ornalasqan eldimekenderdiń ınfraqurylym máselesin sheshý maqsatynda aýqymdy jumystar júrgizilip jatyr.

Sonyń biri - Abaı aýdany aýmaǵynda ornalasqan Soltústik saıajaı shaǵyn aýdanynda qurylys jumystary aıaqtalyp, bıyl sapaly aýyz sýmen qamtylmaq. Merdiger mekeme «Bes Qara» JShS tarapynan qurylys jumystary 2020 jyldyń qarasha aıynda bastalǵan. Jalpy uzyndyǵy 151,8 shaqyrymdy quraıtyn ishki oramdyq aýyz sý júıesiniń búginde 80 paıyzǵa jýyǵy tartyldy.

Qazirgi ýaqytta Soltústik saıajaı shaǵyn aýdany turǵyndary tasymaldy aýyz sýdy paıdalanady. Degenmen, mundaǵy halyqtyń máselesi bıyl sheshimin tabady. Qurylys jumystary tolyǵymen jyl sońyna deıin aıaqtalyp, 6 myńǵa jýyq otbasy sapaly aýyz sýmen qamtylady.

Sonymen qatar, Soltústik saıajaı shaǵyn aýdanyn sapaly elektr qýatymen qamtý qurylysy qarqyndy júrýde. Tamyz aıynda merdiger mekeme «Elektromontaj» tarapynan qurylysy bastalǵan. Búginge deıin 400 elektr baǵanalary ornatylyp, jumystyń 20 paıyzy aıaqtalǵan. Degenmen, qurylys jumysy keler jylǵa ótpeli.