«QazTransGaz» AQ basshysy Prezıdentke esep berdi: «Beıneý-Bozoı-Shymkent» gaz qubyrynyń ekinshi jelisi salynady

Qasym-Jomart Toqaev Aqordada «QazTransGaz» aksıonerlik qoǵamynyń basqarma tóraǵasymen kezdesti. Qaırat Sháripbaev ultyq gaz operatorynyń jetistikteri men saladaǵy negizgi problemalarǵa memleket basshysynyń nazaryn aýdardy, dep jazady baq.kz.

Prezıdent «QazTransGaz» AQ kompanııalar tobynyń bıylǵy segiz aıdaǵy óndiristik jáne qarjylyq kórsetkishterimen tanysty.

Qaırat Sháripbaevtyń aıtýynsha, magıstraldyq tasymaldaý ótken jylmen salystyrǵanda 14% ósip, 65,4 mlrd m3 qurady.

Osy kezeńde ótkizilgen gaz kólemi 14,4 mlrd m3 jetti, biraq ishki tutynýdyń ósýine baılanysty gaz eksporty 20%-ǵa qysqaryp, 4,3 mlrd m3 qurady. Ishki naryqqa gaz jetkizý 14% ulǵaıyp, 10,1 mlrd m3 boldy.

Qarjylyq kórsetkishter boıynsha ulttyq operatordyń tabysy 8 aıda 6% ósip, 1,342 trln teńgeni qurady, al taza paıda 55%-ǵa ósip, 304 mlrd teńgeni qurady. Áleýmettik jaýapkershiligi joǵary kompanııa retinde «QazTransGaz» AQ ishki naryqqa gazdy ózindik qunynan tómen baǵaǵa jetkize otyryp, otandyq tutynýshylardy sýbsıdııalaýyn jalǵastyrýda. 2021 jyly ishki naryqqa gaz ótkizýden keletin shyǵyndar 158,8 mlrd teńge bolmaq.

Bıylǵy 31 tamyzdaǵy jaǵdaı boıynsha bıýdjetke salyq jáne basqa da tólemder retinde 128,4 mlrd teńge aýdaryldy. Kompanııanyń barlyq tabysy otandyq gaz tasymaldaý júıesin qalypty jaǵdaıda ustaýǵa jáne boryshtyq júktemesin azaıtýǵa baǵyttalady. Segiz aı ishinde «QazTransGaz» AQ kompanııalar tobyndaǵy ózge de kásiporyndardy qosqanda 995 mln dolardyń kredıttik qaryzy óteldi. Jalpy 2014-2021 jyldar aralyǵynda QTG kompanııalar tobynyń boryshtyq júktemesi 9,2 mlrd dollarǵa azaıdy.

Kezdesý barysynda gaz tasymaldaý ınfraqurylymyn jańǵyrtý jáne damytý jobalaryna erekshe nazar aýdaryldy. Buǵan birinshi kezekte qoldanystaǵy «Maqat-Soltústik Kavkaz» magıstraldyq gaz qubyryna qatarlas jańa gaz qubyryn (lýpıng) salý, «Beıneý-Jańaózen» magıstraldyq gaz qubyrynyń 2-jelisin salý jáne Mańǵystaý oblysynyń gaz tasymaldaý júıesin qaıta jańartý, Mańǵystaý oblysynyń Aqtaý qalasyndaǵy «Sarsha» mekeni jáne «Jyly jaǵajaı» kýrorttyq aımaǵyn gazdandyrý jatady. Bul jobalar boıynsha jobalyq-smetalyq qujattama ázirlendi.

Bul jobalardy iske asyrý úshin alda josparlanǵan IPO nátıjesinde tartylatyn «QazTransGaz» AQ jeke qarajaty da jumsalmaq.

Memleket basshysyna gaz salasynyń áleýetti jobalary da tanystyryldy. Olardyń ishinde qazirgi ýaqytta múmkindigi tolyq paıdalanylyp otyrǵan «Beıneý-Bozoı-Shymkent» magıstraldyq gaz qubyrynyń ekinshi jelisin salý jospary da bar. Bul jobanyń naqty qashan júzege asatyny beımálim.

Kezdesý barysynda resýrstyq bazany arttyrý boıynsha jobalar usynyldy. Bul Qashaǵandaǵy gaz óńdeý zaýyttaryn salý jáne jańa ken oryndaryn iske qosý esebinen gaz óndirýdi ulǵaıtý.

«QazTransGaz» AQ Basqarma tóraǵasy ulttyq operator kompanııalary tobyn sıfrlandyrý jónindegi jobalar týraly da baıandady. Gaz tasymaldaý júıesi nysandarynyń sıfrlyq kartasyn jasaý boıynsha jumystar jalǵasýda. Búgingi kúni 2 mln abonent, 19 myń km gaz qubyry, 22 kompressorlyq stansııa "sıfrlandyryldy". 2023 jylǵa deıin taǵy 47 myń km. taratý jelisin «sıfrlaý» josparlanyp otyr. Bul derekterdi taldaý arqyly tehnıkalyq qyzmet kórsetý men jóndeý shyǵyndaryn baqylaýǵa múmkindik týady.

Kezdesý sońynda grezıdent odan ári iske asyrýǵa qatysty birqatar mindet qoıdy.